Беседа въ храме

О проектѣ
Новости
Афиша
Бесѣда въ храмѣ
Библiотека
Благотворительность
Церковная лавка
Ссылки


Электронная почта




.

Послѣдованіе ко Св. Причащенію.


Молитвами святыхъ отецъ нашихъ, Господи Іисусе Христе Боже нашъ, помилуй насъ, аминь.
Слава Тебѣ, Боже нашъ, слава Тебѣ.

Царю небесный, Трисвятое, и по Отче нашъ: Господи, помилуй (12 разъ), Слава, и нынѣ: Пріидите, поклонимся: (Трижды), псаломъ 50-й. (1)

И настоящыя псалмы:
Псаломъ 22.

Господь пасеть мя, и ничтоже мя лишитъ. На мѣстѣ злачнѣ, тамо всели мя, на водѣ покойнѣ воспита мя. Душу мою обрати, настави мя на стези правды, имене ради Своего. Аще бо и пойду по средѣ сѣни смертныя, не убоюся зла, яко Ты со мною еси: жезлъ Твой и палица Твоя, та мя утѣшиста. Уготовалъ еси предо мною трапезу сопротивъ стужающымъ мнѣ: умастилъ еси елеомъ главу мою, и чаша Твоя упоявающи мя, яко державна. И милость Твоя поженетъ мя вся дни живота моего: и еже вселитимися въ домъ Господень въ долготу дній.

Псаломъ 23.
Господня земля, и исполненіе ея, вселенная, и вси живущіи на ней. Той на моряхъ основалъ ю есть и на рѣкахъ уготовалъ ю есть. Кто взыдеть на гору Господню? или кто станетъ на мѣстѣ святѣмъ Его? неповиненъ рукама, и чисть сердцемъ: иже не пріятъ всуе душу свою, и не клятся лестію искреннему своему. Сей пріиметъ благословеніе отъ Господа, и милостыню отъ Бога Спаса своего. Сей родъ ищущихъ Господа, ищущихъ лице Бога Іаковля. Возмите врата князи вашя, и возмитеся врата вѣчная: и внидеть Царь славы. Кто есть сей Царь славы? Господь крѣпокъ и силенъ, Господь силенъ въ брани. Возмите врата князи вашя, и возмитеся врата вѣчная: и внидеть Царь славы. Кто есть сей Царь славы? Господь силъ, Той есть Царь славы.

Псаломъ 115.
Вѣровахъ, тѣмже возглаголахъ: азъ же смирихся зѣло. Азъ же рѣхъ во изступленіи моемъ: всякь человѣкъ ложь. Что воздамъ Господеви о всѣхъ, яже воздаде ми? Чашу спасенія пріиму, и имя Господне призову: молитвы моя Господеви воздамъ предъ всѣми людьми Его. Честна предъ Господемъ смерть преподобныхъ Его. О Господи, азъ рабь Твой, азъ рабъ Твой, и сынъ рабыни Твоея: растерзалъ еси узы моя. Тебѣ пожру жертву хвалы, и во имя Господне призову: молитвы моя Господеви воздамъ предъ всѣми людьми Его: во дворѣхъ дому Господня, посредѣ тебе, Іерусалиме.

Слава, и нынѣ:
Аллллуiя (Трижды.) И поклоны три.

Тропари, гласъ 8-й.
Беззаконія моя презри, Господи, оть Дѣвы рождейся, и сердце мое очисти, храмъ то творя пречистрму Твоему тѣлу и крови: ниже отрини мене отъ Твоего лица, безъ числа имѣяй велію милость.
Слава: Во причастіе святынь Твоихъ како дерзну недостойный? Аще бо дерзну къ Тебѣ приступитй съ достойными, хитонъ мя обличаетъ, яко нѣсть вечерній: и осужденіе исходатайствую многогрѣшной души моей. Очисти, Господи, скверну души моея, и спаси мя, яко Человѣколюбецъ.
И нынѣ: Многая множества моихъ, Богородице, прегрѣшеній, къ Тебѣ прибѣгохъ, Чистая, спасенія требуя: посѣти немоществующую мою душу, и моли Сына Твоего и Бога нашего, дати ми оставленіе, яже содѣяхъ лютыхъ, едина благословенная.

Во святую же и Великую Четыредесятницу рцы сіе:
Егда славніи ученицы на умовеніи вечери просвѣщахуся, тогда Іуда злочестивый сребролюбіемъ недуговавъ омрачашеся, и беззаконнымъ судіямъ Тебе праведнаго Судію предаетъ. Виждь, имѣній рачителю, сихъ ради удавленіе употребивша: бѣжи несытыя души, Учителю таковая дерзнувшія. Иже о всѣхъ благій Господи, слава Тебѣ.

Псаломъ 50
Помилуй мя, Боже, по велицѣй милости Твоей, и по множеству щедротъ Твоихъ очисти беззаконіе мое. Наипаче омый мя отъ беззаконія моего, и отъ грѣха моего очисти мя; яко беззаконіе мое азъ знаю, и грѣхъ мой предо мною есть выну. Тебѣ Единому согрѣшихъ и лукавое предъ Тобою сотворихъ, яко да оправдишися во словесѣхъ Твоихъ, и побѣдиши внегда судити Ти. Се бо, въ беззаконіяхъ зачатъ есмь, и во грѣсѣхъ роди мя мати моя. Се бо, истину возлюбилъ еси; безвѣстная и тайная премудрости Твоея явилъ ми еси. Окропиши мя vссопомъ, и очищуся; омыеши мя, и паче снѣга убѣлюся. Слуху моему даси радость и веселіе; возрадуются кости смиренныя. Отврати лице Твое отъ грѣхъ моихъ и вся беззаконія моя очисти. Сердце чисто созижди во мнѣ, Боже, и духъ правъ обнови во утробѣ моей. Не отвержи мене отъ лица Твоего и Духа Твоего Святаго не отыми отъ мене. Воздаждь ми радость спасенія Твоего и Духомъ владычнимъ утверди мя. Научу беззаконыя путемъ Твоимъ, и нечестивiи къ Тебѣ обратятся. Избави мя отъ кровей, Боже, Боже спасенія моего; возрадуется языкъ мой правдѣ Твоей. Господи, устнѣ мои отверзеши, и уста моя возвѣстятъ хвалу Твою. Яко аще бы восхотѣлъ еси жертвы, далъ быхъ убо: всесожженія не благоволиши. Жертва Богу духъ сокрушенъ; сердце сокрушенно и смиренно Богъ не уничижитъ. Ублажи, Господи, благоволеніемъ Твоимъ Сіона, и да созиждутся стѣны Іерусалимскія. Тогда благоволиши жертву правды, возношеніе и всесожегаемая; тогда возложатъ на Твой oлтарь тельцы.

И абіе: Канонъ, гласъ 2-й. Пѣснь 1.
Ирмось: Грядите людіе, поимъ пѣснь Христу Богу, раздѣльшему море, и наставльшему люди, яже изведе из работы египетскія, яко прославися.

Сердце чисто созижди во мнѣ, Боже, и духъ правъ обнови во утробѣ моей.

Хлѣбъ живота вѣчнующаго да будетъ ми Тѣло Твое Святое, благоутробне Господи, и Честная Кровь, и недугъ многообразныхъ исцѣленіе.

Не отвержи мене отъ лица Твоего, и Духа Твоего святаго не отъими оть мене..

Оскверненъ дѣлы безмѣстными окаянный, Твоего Пречистаго Тѣла и Божественныя Крове недостойнъ есмь, Христе; причащенія, егоже мя сподоби.

Пресвятая Богородице, спаси насъ.
Богородиченъ: Земле благая, благословенная Богоневѣсто, класъ прозябшая неоранный и спасительный міру, сподоби мя сей ядуща спастися.

Пѣснь 3.
Ирмось: На камени мя вѣры утвердивъ, разширилъ еси уста моя на враги моя. Возвеселибося духъ мой, внегда пѣти: нѣсть святъ якоже Богь нашъ, и нѣсть праведенъ паче Тебе, Господи.
      Слезныя ми подаждь, Христе, капли, скверну сердца моего очищающыя: яко да благою совѣстію очищенъ, вѣрою прихожду и страхомъ, Владыко, ко причащенію Божественныхъ даровъ Твоихъ.
      Во оставленіе да будетъ ми прегрѣшеній Пречистое Тѣло Твое и Божественная Кровь, Духа же Святаго общеніе, и въ жизнь вѣчную, Человѣколюбче, и страстей и скорбей отчужденіе.
Богородиченъ:. Хлѣба животнаго трапеза Пресвятая, свыше милости ради сшедшаго, и мірови новый животъ дающаго, и мене нынѣ сподоби недостойнаго, со страхомъ вкусити сего, и живу быти.

Пѣснь 4.
Ирмось: Пришелъ еси отъ Дѣвы, не ходатай, ни Ангелъ, но Самъ Господи воплощся и спаслъ еси всего мя человѣка. Тѣмъ зову Ти: слава силѣ Твоей, Господи.
      Восхотѣлъ еси, насъ ради воплощся, Многомилостиве, закланъ быти яко овча, грѣхъ ради человѣческихъ: тѣмже молю Тя, и мои очисти согрѣшенія.
      Исцѣли души моея язвы, Господи, и всего освяти; и сподоби, Владыко, яко да причащуся тайныя Твоея Божественныя вечери, окаянный.
Богородиченъ: Умилостиви и мнѣ Сущаго оть утробы Твоея, Владычице, и соблюди мя нескверна раба Твоего, и непорочна, яко да пріемъ умнаго бисера, освящуся.

Пѣснь 5.
Ирмось: Свѣта подателю и вѣковъ Творче, Господи, во свѣтѣ Твоихъ повелѣній настави насъ: развѣ бо Тебе, иного бога не знаемъ.
      Якоже предреклъ еси, Христе, да будетъ убо худому рабу Твоему, и во мнѣ пребуди, якоже обѣщался еси: се бо Тѣло Твое ямъ Божественное, и пію Кровь Твою.
      Слове Божій и Боже, угль Тѣла Твоего да будетъ мнѣ помраченному въ просвѣщеніе, и очищеніе оскверненной души моей Кровь Твоя.
Богородиченъ: Маріе, Мати Божія, благоуханія честное селеніе, Твоими молитвами сосудъ мя избранный содѣлай, яко да освященій причащуся Сына Твоего.

Пѣснь 6.
Ирмось: Въ безднѣ грѣховнѣй валяяся, неизслѣдную милосердія Твоего призываю бездну отъ тли, Боже, мя возведи.
      Умъ, душу и сердце освяти, Спасе, и тѣло мое: и сподоби неосужденно, Владыко, къ страшнымъ тайнамъ приступити.
     Дабы устранился отъ страстей, и Твоея благодати имѣлъ бы приложеніе, живота же утвержденіе, причащеніемъ Святыхъ, Христе, Таинъ Твоихъ.
Богородиченъ: Божіе, Боже, Слово Святое, всего мя освяти нынѣ приходящаго къ Божественнымъ Твоимъ Тайнамъ, Святыя Матере Твоея мольбами.

Кондакь, гласъ 2-й.
Хлѣбъ, Христе, взяти не презри мя, Тѣло Твое, и Божественную Твою нынѣ Кровь, пречистыхъ, Владыко, и страшныхъ Твоихъ Таинъ причаститися окаяннаго, да не будетъ ми въ судъ, да будеть же ми въ животъ вѣчный и безсмертный.

Пѣснь 7.
Ирмось: Тѣлу златому премудрыя дѣти не послужиша, и вь пламень сами поидоша, и боги ихъ обругаша, среди пламене возопиша, и ороси я Ангелъ: услышася уже устъ вашихъ молитва.
      Источникъ благихъ, причащеніе, Христе, безсмертныхъ Твоихъ нынѣ Таинствъ да будетъ ми свѣтъ, и животь, и безстрастіе, и къ преспѣянію же и умноженію добродѣтели Божественнѣйшія ходатайственно, едине Блаже, яко да славлю Тя.
      Да избавлюся оть страстей, и враговъ и нужды, и всякія скорби, трепетомъ, и любовію со благоговѣніемъ, Человѣколюбче, приступаяй нынѣ къ Твоимъ безсмертнымъ и Божественнымъ Тайнамъ, и пѣти Тебѣ сподоби: благословенъ еси, Господи, Боже отець нашихъ.
Богородиченъ: Спаса Христа рождшая паче ума, Богоблагодатная, молю Тя нынѣ, рабъ Твой, Чистую нечистый: хотящаго мя нынѣ къ пречистымъ Тайнамъ приступити, очисти всего отъ скверны плоти и духа.

Пѣснь 8.
Ирмось: Въ пещь огненную ко отрокомъ Еврейскимъ снизшедшаго, и пламень въ росу преложшаго Бога, пойте дѣла яко Господа, и превозносите во вся вѣки.
      Небесныхъ, и страшныхъ, и святыхъ Твоихъ, Христе, нынѣ Таинъ, и Божественныя Твоея и тайныя вечери, общника быти и мене сподоби отчаяннаго, Боже Спасе мой.
      Подъ Твое прибѣгь благоутробіе, Блаже, со страхомъ зову Ти: во мнѣ пребуди Спасе, и азъ, якоже реклъ еси, въ Тебѣ: се бо дерзая на милость Твою, ямъ Тѣло Твое, и пію Кровь Твою.
Троиченъ: Трепещу пріемля огнь, да не опалюся яко воскъ, и яко трава: оле страшнаго таинства! оле благоутробія Божія! како Божественнаго Тѣла и Крове бреніе причащаюся, и нетлѣненъ сотворяюся.

Пѣснь 9.
Ирмось: Безначальна Родителя Сынъ, Богь и Господь, воплощся отъ Дѣвы, намъ яви, омраченныя просвѣти, собрати расточенная: тѣмъ всепѣтую Богородицу величаемъ.
      Христосъ есть, вкусите и видите: Господь насъ ради, по намъ бо древле бывый, единою Себе принесъ, яко приношеніе Отцу Своему, присно закалается, освящаяй причащающыеся.
      Душею и тѣломъ да освящуся, Владыко, да просвѣщуся, да спасуся, да буду домъ Твой, причащеніемъ священныхъ Таинъ, живущаго Тя имѣя въ себѣ со Отцемъ и Духомъ, Благодетелю Многомилостиве.
      Якоже огнь да будетъ ми, и яко свѣтъ, Тѣло Твое и Кровь, Спасе мой, пречестная, опаляя грѣховное вещество, сжигая же страстей терніе, и всего мя просвѣщая, покланятися Божеству Твоему.
Богородиченъ: Богь воплотися отъ чистыхъ кровей Твоихъ: тѣмже всякій родъ поеть Тя, Владычице, умная же множества славятъ, яко Тобою явѣ узрѣша всѣми Владычествующаго, осуществовавшегося человѣчествомъ.

И абие:
Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнѣйшую Херувимъ и Cлавнѣйшую безъ сравненія Серафимъ, безъ истлѣнія Бога Слова рождшую, сущую Богородицу Тя величаемъ.
Слава, и нынѣ
Господи, помилуй. (Трижды)

Трисвятое
Святый Боже, Святый Крѣпкій, Святый Безсмертный, помилуй насъ. (Читается трижды, съ крестнымъ знаменіемъ и пояснымъ поклономъ.)

Слава Отцу и Сыну и Святому Духу, и нынѣ и присно и во вѣки вѣковъ. Аминь.

Молитва ко Пресвятой Троицѣ
Пресвятая Троице, помилуй насъ; Господи, очисти грѣхи наша; Владыко, прости беззаконія наша; Святый, посѣти и исцѣли немощи наша, имене Твоего ради. Господи, помилуй. (Трижды). Слава, и нынѣ.

Молитва Господня
Отче нашъ, Иже еси на небесѣхъ! Да святится имя Твое, да пріидетъ Царствіе Твое, да будетъ воля Твоя, яко на небеси и на земли. Хлѣбъ нашъ насущный даждь намъ днесь; и остави намъ долги наша, якоже и мы оставляемъ должникомъ нашимъ; и не введи насъ во искушеніе, но избави насъ отъ лукаваго.

Тропарь дне, аще есть праздникъ Христова Рождества, или иный. Аще недѣля, тропарь воскресный по гласу. Аще же ни, сія, глась 6-й.
Помилуй насъ, Господи, помилуй насъ; всякаго бо отвѣта недоумѣюще, сію Ти молитву яко Владыцѣ грѣшнiи приносимъ: помилуй насъ.
Слава: Господи, помилуй насъ, на Тя бо уповахомъ; не прогнѣвайся на ны зѣло, ниже помяни беззаконій нашихъ, но призри и нынѣ яко благоутробенъ, и избави ны отъ врагъ нашихъ; Ты бо еси Богъ нашъ, и мы людіе Твои, вси дѣла руку Твоею, и имя Твое призываемъ.
И нынѣ: Милосердія двери отверзи намъ, благословенная Богородице, надѣющiися на Тя да не погибнемъ, но да избавимся Тобою отъ бѣдъ: Ты бо еси спасеніе рода христіанскаго.
Господи, помилуй. (40 разъ) И поклоны, елико хощеши.

И абие настоящыя стихи:

Хотя ясти, человѣче, Тѣло Владычне,
Страхомъ приступи, да не опалишися: огнь бо есть.
Божественную же пія Кровь ко общенію,
Первѣе примириея тя опечалившимъ,
Таже дерзая, таинственное брашно яждь.

Ины стихи:

Прежде причастія страшныя жертвы,
Животворящаго Тѣла Владычня,
Симъ помолися образомъ со трепетомъ:

Молитва Великаго Василія, 1-я:
Владыко Господи Іисусе Христе, Боже нашъ, источниче жизни и безсмертія, всея твари видимыя и невидимыя Содѣтелю, безначальнаго Отца соприсносущный Сыне и собезначальный: премногія ради благости, въ послѣднія дни въ плоть оболкійся и распныйся, и погребыйся за ны неблагодарныя и злонравныя, и Твоею кровію обновивый растлѣвшее грѣхомъ естество наше: Самъ, Безсмертный Царю, пріими и мое грѣшнаго покаяніе, и приклони ухо Твое мнѣ, и услыши глаголы моя. Согрѣшихъ бо, Господи, согрѣшихъ на небо и предъ Тобою, и нѣсмь достоинъ воззрѣти на высоту славы Твоея: прогнѣвахъ бо Твою благость, Твоя заповѣди преступивъ, и не послушавъ Твоихъ повелѣній. Но Ты, Господи, незлобивъ сый, долготерпѣливъ же и многомилостивъ, не предалъ еси мя погибнути со беззаконьми моими, моего всячески ожидая обращенія. Ты бо реклъ еси, Человѣколюбче, пророкомъ Твоимъ: яко хотѣніемъ не хощу смерти грѣщника, но еже обратитися и живу быти ему. Не хощеши бо, Владыко, созданія Твоею руку погубити, ниже благоволиши о погибели человѣчестѣй, но хощеши всѣмъ спастися, и въ разумъ истины пріити. Тѣмже и азъ, аще и недостоинъ есмь небесе и земли, и сея привременныя жизни, всего себя повинувъ грѣху, и сластемъ поработивъ, и Твой осквернивъ образъ: но твореніе и созданіе. Твое бывъ, не отчаяваю своего спасенія окаянный, на Твое же безмѣрное благоутробіе дерзая прихожду. Пріими убо и мене, Человѣколюбче Господи, якоже блудницу, яко разбойника, яко мытаря, и яко блуднаго: и возми мое тяжкое бремя грѣховъ, грѣхъ вземляй міра, и немощи человѣческія исцѣляяй, труждающыяся и обремененныя къ Себѣ призываяй и упокоеваяй: не пришедый призвати праведная, но грѣшныя на покаяніе: и очисти мя оть всякія скверны плоти и духа, и научи мя совершати святыню во страсѣ Тво емъ: яко да чистымъ свидѣніемъ совѣсти моея, святынь Твоихъ часть пріемля, соединюся святому Тѣлу Твоему и Крови, и имѣю Тебе во мнѣ живуща и пребы вающа, со Отцемъ, и Святымъ Твоимъ Духомъ. Ей, Господи Іисусе Христе, Боже мой! и да не въ судъ ми будетъ причастіе пречистыхъ и животворящихъ Таинъ Твоихъ, ниже да немощенъ буду душею же и тѣломъ, оть еже недостойнѣ тѣмъ причащатися: но даждь ми, даже до конечнаго моего издыханія, неосужденно воспріимати часть святынь Твоихъ, въ Духа Святаго общеніе, въ напутіе живота вѣчнаго, и во благопріятенъ отвѣть на страшнѣмъ судищи Твоемъ: яко да и азъ со всѣми избранными Твоими общникъ буду нетлѣнныхъ Твоихъ благь, яже уготовалъ еси любящымъ Тя, Господи: въ нихже препрославленъ еси во вѣки. Аминь.

Молитва иже во святыхъ отца нашего Іоанна Златоустаго, 2-я:
Господи Боже мой, вѣмъ, яко нѣсмь достоинъ, ниже доволенъ, да подъ кровъ внидешм храма души моея, занеже весь пусть и пался есть, и не имаши вб мнѣ мѣста достойна, еже главу подклонити: но якоже съ высоты насъ ради смирилъ еси Себе, смирися и нынѣ смиренію моему: и якоже воспріялъ еси въ вертепѣ и въ яслѣхъ безсловесныхъ возлещи, сице воспріими и въ яслѣхъ безсловесныя моея души, во оскверненное мое тѣло внити. И якоже не неудостоилъ еси внити, и свечеряти со грѣшники въ дому Симона прокаженнаго, тако изволи внити и въ домъ смиренныя моея души, прокаженныя и грѣшныя: и якоже не отринулъ еси подобную мнѣ блудницу, и грѣшную, пришедшую и прикоснувшуюся Тебѣ, сице умилосердися и о мнѣ грѣшнѣмъ, приходящемъ и прикасающемтися; и якоже не возгнушался скверныхъ ея усть и нечистыхъ, цѣлующихъ Тя, ниже моихъ возгнушайся скверншихъ оныя устъ и нечистшихъ, ниже мерзкихъ моихъ и нечистыхъ устенъ, и сквернаго и нечистѣйшаго моего языка. Но да будетъ ми угль пресвятаго Твоего Тѣла и честныя Крове, во освященіе, и просвѣщеніе и здравіе смиреннѣй моей души и тѣлу, во облегченіе тяжестей многихъ моихъ согрѣшеній, въ соблюденіе отъ всякаго діавольскаго дѣйства, во отгнаніе и возбраненіе злаго моего и лукаваго обычая, во умерщвленіе страстей, въ снабдѣніе заповѣдей Твоихъ, въ приложеніе Божественныя Твоея благодати, и Твоего Царствія присвоеніе. Не бо яко презираяй прихожду къ Тебѣ, Христе Боже, но яко дерзая на неизреченную Твою благость, и да не на мнозѣ удаляяйся общенія Твоего, оть мысленнаге волка звѣроуловленъ буду. Тѣмже молюся Тебѣ: яко единъ сый Святъ, Владыко, освяти мою душу и тѣло, умъ и сердце, чревеса и утробы, и всего мя обнови, и вкорени страхъ Твой во удесѣхъ моихъ, и освященіе Твое неотъемлемо отъ мене сотвори: и буди ми помощникъ и заступникъ, окормляя въ мирѣ животь мой, сподобляя мя и одесную Тебе предстоянія со святыми Твоими, молитвами и моленьми Пречистыя Твоя Матери, невещественныхъ Твоихъ служителей и пречистыхъ силъ, и всѣхъ святыхъ, отъ вѣка Тебѣ благоугодившихъ. Аминь.

Молитва иная, Сѵмеона Метафраста, 3-я:
Едине чистый и нетлѣнный Господи, за неизреченную милость человѣколюбія, наше все воспріемый смѣшеніе, отъ чистыхъ и дѣвственныхъ кровей паче естества Рождшія Тя, Духа Божественнаго нашествіемъ, и благоволеніемъ Отца присносущнаго, Христе Іисусе, премудросте Божія, и мире, и сило: Твоимъ воспріятіемъ животворящая и спасительная страданія воспріемый, крестъ, гвоздія, копіе, смерть: умертви моя душетленная страсти тѣлесныя. Погребеніемъ Твоимъ адова плѣнивый царствія, погреби моя благими помыслы лукавая совѣтованія, и лукавствія духи разори. Тридневнымъ Твоимъ и живоноснымъ воскресеніемъ падшаго праотца возставивый, возстави мя грѣхомъ поползшагося, образы мнѣ покаянія предлагая. Преславнымъ Твоимъ вознесеніемъ плотское обоживый воспріятіе, и сіе деснымъ Отца сѣдѣніемъ почтый, сподоби мя причастіемъ святыхъ Твоихъ Таинъ, десную часть спасаемыхъ получити. Снитіемъ Утѣшителя Твоего Духа сосуды честны священныя Твоя ученики содѣлавый, пріятелище и мене покажи Того пришествія. Хотяй паки пріити судити вселеннѣй правдою, благоволи и мнѣ усрѣсти Тя на облацѣхъ, Судію и Создателя моего, со всѣми святыми Твоими: да безконечно славословлю и воспѣваю Тя, со безначалыіымъ Твоимъ Отцемъ, и Пресвятымъ и благамъ и животворящимъ Твоимъ Духомъ, нынѣ и присно, и во вѣки вѣковъ. Аминь.

Божественнаго Дамаскина, 4-я:
Владыко Господи Іисусе Христе, Боже нашъ, едине имѣяй власть человѣкомъ оставляти грѣхи, яко благъ и Человѣколюбецъ презри моя вся въ вѣдѣніи и не въ вѣдѣніи прегрѣшенія: и сподоби мя неосужденно причаститися Божественныхъ, и преславныхъ, и пречистыхъ, и животворящихъ Твоихъ Таинъ, не въ тяжесть, ни въ муку, ни въ приложеніе грѣховъ: но во очищеніе, и освященіе, и обрученіие будущаго живота и царствія, въ стѣну и помощь, и въ возраженіе сопротивныхъ, во истребленіе многихъ моихъ согрѣшеній. Ты бо еси Богъ милости, и щедротъ, и человѣколюбія, и Тебѣ славу возсылаемъ, со Отцемъ, и Святымъ Духомъ, нынѣ и присно, и во вѣки вѣковъ. Аминь.

Великаго Василія, 5-я:
Вѣмъ, Господи, яко недостойнѣ при чащаюся пречистаго Твоего Тѣла и честныя Твоея Крове, и повиненъ есмь, и судъ себѣ ямъ и пію, не разсуждая Тѣла и Крове Тебе Христа и Бога моего: но на щедроты Твоя дерзая прихожду къ Тебѣ рекшему: ядый Мою плоть, и піяй Мою кровь, во Мнѣ пребываеть, и Азъ въ немъ. Умилосердися убо, Господи, и не обличи мя грѣшнаго, но сотвори со мною по милости Твоей: и да будуть ми святая сія, во исцѣленіе, и очищеніе, и просвѣщеніе, и сохраненіе, и спасеніе, и во освященіе души и тѣла: во отгнаніе всякаго мечтанія, и лукаваго дѣянія, и дѣйства діавольскаго, мысленнѣ во удесѣхъ моихъ дѣйствуемаго, въ дерзновеніе и любовь яже къ Тебѣ: во исправленіе житія и утвержденіе, въ возвращеніе добродѣтели и совершенства: во исполненіе заповѣдей, въ Духа Святаго общеніе, въ напутіе живота вѣчнаго, во отвѣтъ благопріятенъ на стращнѣмъ судищи Твоемъ: не въ судъ, или во осужденіе.

Молитва св. Сѵмеона Новаго Богослова, 6-я:
Отъ скверныхъ устенъ, оть мерзкаго сердца, отъ нечистаго языка, отъ души осквернены, пріими моленіе, Христе мой, и не презри моихъ, ни словесъ, ниже образовъ, ниже безстудія. Даждь ми дерзновенно глаголати, яже хощу, Христе мой, паче же и научи мя, что ми подобаетъ творити и глаголати: согрѣшихъ паче блудницы, яже увѣдѣ гдѣ обитаеши, мѵро купивши, пріиде дерзостнѣ помазати Твои нозѣ, Бога моего, Владыки и Христа моего. Якоже ону не отринулъ еси пришедшую оть сердца, ниже мене возгнушайся, Слове: Твои же ми подаждь нозѣ, и держати и цѣловати, и струями слезными, яко многоцѣннымъ Владыки и Бога моего: божественныхъ бо причащаяйся и боготворящихъ благодатей, не убо есмь единъ, но съ Тобою, Христе мой, свѣтомъ трисолнечнымъ, просвѣщающимъ міръ. Да убо не единъ пребуду кромѣ Тебе Живодавца, дыханія моего, живота моего, радованія моего, спасенія міру. Сего ради къ Тебѣ приступихъ, якоже зриши, со слезами, и душею сокрушенною, избавленія моихъ прегрѣшеній прошу пріяти ми, и Твоихъ живодательныхъ и непорочныхъ таинствъ причаститися неосужденно, да пребудеши, якоже реклъ еси, со мною треокаяннымъ, да не кромѣ обрѣтъ мя Твоея благодати, прелестникъ восхитить мя льстивнѣ, и прельстивъ отведеть боготворящихъ Твоихъ словесъ. Сего ради къ Тебѣ припадаю, и теплѣ вопію Ти: якоже блуднаго пріялъ еси, и блудницу пришедшую: тако пріими мя блуднаго и сквернаго, Щедре. Душею сокрушенною, нынѣ бо къ Тебѣ приходя, вѣмъ, Спасе, яко иный, якоже азъ, не прегрѣши Тебѣ, ниже содѣя дѣянія, яже азъ содѣяхъ. Но сіе паки вѣмъ, яко не величество прегрѣшеній, ни грѣховъ множество превосходить Бога моего многое долготерпѣніе, и человѣколюбіе крайнее: но милостію сострастія теплѣ кающыяся, и чистиши, и свѣтлиши, и свѣта твориши причастники, общники Божества Твоего содѣловаяй независтно, и странное и Ангеломъ, и человѣческимъ мыслемъ, бесѣдуеши имъ многажды, якоже другомъ Твоимъ истиннымъ. Сія дерзостна творять мя, сія вперяють мя, Христе мой. И дерзая Твоимъ богатымъ къ намъ благодѣяніемъ, радуяся вкупѣ и трепеща, огневи причащаюся, трава сый, и странно чудо, орошаемь неопально, якоже убо купина древле неопальнѣ горящи. Нынѣ благодарною мыслію, благодарнымъ же сердцемъ, благодарными удесы моими, души и тѣла моего, покланяюся и величаю, и славословлю Тя, Боже мой, яко благословенна суща, нынѣ же и во вѣки.

Молитва иная Златоустаго, 7-я:
Боже, ослаби, остави, прости ми согрѣшенія моя, елика Ти согрѣшихъ, аще словомъ, аще дѣломъ, аще помышленіемъ, волею или неволею, разумомъ или неразуміемъ, вся ми прости яко благъ и Человѣколюбецъ. И молитвами Пречистыя Твоея Матере, умныхъ Твоихъ служителей и святыхъ силъ, и всѣхъ святыхъ, оть вѣка Тебѣ благоугодившихъ, неосужденно благоволи пріяти ми святое и пречистое Твое Тѣло и честную Кровь, во исцѣленіе души же и тѣла, и во очищеніе лукавыхъ моихъ помышленій. Яко Твое есть царство и сила и слава, со Отцемъ и Святымъ Духомъ, нынѣ и присно, и во вѣки вѣковъ. Аминь.

Тогожде, 8-я:
Нѣсмь доволенъ, Владыко Господи, да внидеши подъ кровъ души моея: но понеже хощеши Ты, яко Человѣколюбецъ жити во мнѣ, дерзая приступаю: повелѣваеши, да отверзу двери, яже Ты единъ создалъ еси, и внидеши со человѣколюбіемъ якоже еси, внидеши и просвѣщаеши помраченный мой помыслъ: вѣрую, яко сіе сотвориши: не бо блудницу, со слезами пришедшую къ Тебѣ, отгналъ еси: ниже мытаря отверглъ еси покаявшася: ниже разбойника, познавша царство Твое, отгналъ еси: ниже гонителя покаявшася оставилъ еси, еже бѣ: но отъ покаянія Тебѣ пришедшыя вся, въ лицѣ Твоихъ друговъ вчинилъ еси, единъ сый благословенный всегда, нынѣ и въ безконечныя вѣки. Аминь.

Тогожде, 9-я:
Господи Іисусе Христе, Боже мой, ослаби, остави, очисти, и прости ми, грѣшному, и непотребному, и недостойному рабу Твоему прегрѣшенія, и согрѣшенія, и грѣхопаденія моя, елика Ти отъ юности моея, даже до настоящаго дне и часа согрѣшихъ: аще въ разумѣ и въ неразуміи, аще въ словесѣхъ или дѣлѣхъ, или помышленіихъ и мыслехъ, и начинаніяхъ, и всѣхъ моихъ чувствахъ. И молитвами безсѣменно рождшія Тя, Пречистыя и Приснодѣвы Маріи, Матере Твоея, единыя непостыдныя надежды и предстательства и спасенія моего, сподоби мя неосужденно причаститися пречистыхъ, безсмертныхъ, животворящихъ и страшныхъ Твоихъ Таинствъ, во оставленіе грѣховъ и въ жизнь вѣчную: во освященіе, и просвѣщеніе, крѣпость, исцѣленіе, и здравіе души же и тѣла, и въ потребленіе и всесовершенное погубленіе лукавыхъ моихъ помысловъ, и помышленій, и предпріятій, и нощныхъ мечтаній, темныхъ и лукавыхъ духовъ: яко Твое есть царство, и сила, и слава, и честь, и поклоненіе, со Отцемъ и Святымъ Твоимъ Духомъ, нынѣ и присно, и во вѣки вѣковъ. Аминь.

Молитва иная Іоанна Дамаскина, 10-я:
Предъ дверьми храма Твоего предстою, и лютыхъ помышленій не отступаю: но Ты, Христе Боже, мытаря оправдивый, и Хананею иомиловавый, и разбойнику рая двери отверзый, отверзи ми утробы человѣколюбія Твоего, и пріими мя приходяща и прикасающася Тебѣ, яко блудницу, и кровоточивую: ова убо края ризы Твоея коснувшися, удобь исцѣленіе пріятъ: ова же пречистѣи Твои нозѣ удержавши, разрѣшеніе грѣховъ понесе. Азъ же, окаянный, все Твое Тѣло дерзая воспріяти, да не опаленъ буду: но пріими мя, якоже оныя, и просвѣти моя душевныя чувства, попаляя моя грѣховныя вины, молитвами безсѣменно Рождшія Тя, и небесныхъ силъ; яко благословенъ еси во вѣки вѣковъ. Аминь.

Молитва иная Златоустаго:
Вѣрую, Господи, и исповѣдую, яко Ты еси воистинну Христосъ, Сынъ Бога живаго, пришедый въ міръ грѣшныя спасти, оть нихже первый есмь азъ. Еще вѣрую, яко сіе самое есть пречистое Тѣло Твое, и сія самая есть честная Кровь Твоя. Молюся убо Тебѣ: помилуй мя, и прости ми прегрѣшенія моя, вольная и невольная, яже словомъ, яже дѣломъ, яже вѣдѣніемъ и невѣдѣніемъ, и сподоби мя неосужденно причаститися пречистыхъ Твоихъ Таинствъ, во оставленіе грѣховъ, и въ жизнь вѣчную. Аминь.

Приходяй же причаститися, глаголи въ себѣ настоящыя стихи Метафраста:
Се приступаю къ Божественному Причащенію.
Содѣтелю, да не опалиши мя пріобщеніемъ:
Огнь бо еси, недостойныя попаляя.
Но убо очисти мя отъ всякія скверны.

Таже паки глаголи:
Вечери Твоея тайныя днесь, Сыне Божій, причастника мя пріими: не бо врагомъ Твоимъ тайну повѣмъ, ни лобзанія Ти дамъ, яко Iуда, но яко разбойникъ, исповѣдую Тя: помяни мя, Господи, во Царствіи Твоемъ.

Паки стихи сія:
Боготворящую Кровь ужаснися, человѣче, зря:
Огнь бо есть, недостойныя попаляяй. Божественное Тѣло и обожаетъ мя и питаетъ.
Обожаетъ духъ, умъ же питаетъ странно.

Таже тропари:
Усладилъ мя еси любовію, Христе, и измѣнилъ мя еси Божественнымъ Твоим раченіемъ: но попали огнемъ невещественнымъ грѣхи моя, и насытитися еже въ Тебѣ, наслажденія сподоби: да ликуя возвеличаю, Блаже, два пришествія Твоя.
      Во свѣтлостехъ святыхъ, Твоихъ како вниду недостойный? Аще бо дерзну совнити въ чертогъ, одежда мя обличаетъ, яко нѣсть брачна, и связанъ изверженъ буду отъ Ангеловъ. Очисти, Господи, скверну скверну души моея, и спаси мя, яко Человѣколюбецъ.

Таже молитву:
Владыко Человѣколюбче, Господи Іисусе Христе, Боже мой, да не въ судъ ми будуть святая сія, за еже недостойну ми быти: но во очищеніе и освященіе души же и тѣла, и во обрученіе будущія жизни и царствія. Мнѣ же, еже прилѣплятися Богу, благо есть, полагати во Господѣ упованіе спасенія моего.

И паки:
Вечери Твоея тайныя днесь, Сыне Божій, причастника мя пріими: не бо врагомъ Твоимъ тайну повѣмъ, ни лобзанія Ти дамъ, яко Іуда, но яко разбойникъ, исповѣдую Тя: помяни мя, Господи, во Царствіи Твоемъ.

–––––––––––––––––––––––
(1) Молитвы, читаемыя передъ канономъ. Въ концѣ вступительныхъ молитвъ, послѣ 50-го псалма можно также прочитать Сvмволъ Вѣры.



«Вернуться къ оглавленiю Благодарственныя молитвы по Святомъ Причащеніи.»

Молитвенная помощь
      Просимъ молитвъ нашихъ читателей о здравіи и спасении души іеромонаха Митрофана, іеромонаха Варѳоломея, протоіерея Владиміра, іерея Бориса, iерея Алексѣя, рабовъ Божiихъ Виктора, Максима, Сергия, Галины, Елены, Татианы и всехъ Православныхъ Христианъ.

  Авторъ проекта Викторъ Богучаровъ .

  © 2008–2010, «Бесѣда въ храмѣ» .