Беседа въ храме

О проектѣ
Новости
Афиша
Бесѣда въ храмѣ
Библiотека
Благотворительность
Церковная лавка
Ссылки


Электронная почта




.

Молитвы на сонъ грядущимъ


Во имя Отца, и Сына, и Святаго Духа, Аминь.
Господи Іисусе Христе, Сыне Божій, молитвъ ради Пречистыя Твоея Матере и всѣхъ святыхъ, помилуй насъ. Аминь.
Слава Тебѣ, Боже нашъ, слава Тебѣ.
Царю Небесный, Утѣшителю, Душе истины, Иже вездѣ сый и вся исполняяй, Сокровище благихъ и жизни Подателю, пріиди и вселися въ ны, и очисти ны отъ всякія скверны, и спаси, Блаже, души наша.
Святый Боже, Святый Крѣпкій, Святый Безсмертный, помилуй насъ. (Читается трижды, съ крестнымъ знаменіемъ и пояснымъ поклономъ.)

Слава Отцу и Сыну и Святому Духу, и нынѣ и присно и во вѣки вѣковъ. Аминь.

Молитва ко Пресвятой Троицѣ
Пресвятая Троице, помилуй насъ; Господи, очисти грѣхи наша; Владыко, прости беззаконія наша; Святый, посѣти и исцѣли немощи наша, имене Твоего ради. Господи, помилуй. (Трижды). Слава, и нынѣ.
Отче нашъ, Иже еси на небесѣхъ! Да святится имя Твое, да пріидетъ Царствіе Твое, да будетъ воля Твоя, яко на небеси и на земли. Хлѣбъ нашъ насущный даждь намъ днесь; и остави намъ долги наша, якоже и мы оставляемъ должникомъ нашимъ; и не введи насъ во искушеніе, но избави насъ отъ лукаваго.

Тропари:
Помилуй насъ, Господи, помилуй насъ; всякаго бо отвѣта недоумѣюще, сію Ти молитву яко Владыцѣ грѣшнiи приносимъ: помилуй насъ.
Слава: Господи, помилуй насъ, на Тя бо уповахомъ; не прогнѣвайся на ны зѣло, ниже помяни беззаконій нашихъ, но призри и нынѣ яко благоутробенъ, и избави ны отъ врагъ нашихъ; Ты бо еси Богъ нашъ, и мы людіе Твои, вси дѣла руку Твоею, и имя Твое призываемъ.
И нынѣ: Милосердія двери отверзи намъ, благословенная Богородице, надѣющiися на Тя да не погибнемъ, но да избавимся Тобою отъ бѣдъ: Ты бо еси спасеніе рода христіанскаго. Господи, помилуй. (12 разъ)

Молитва 1-я, святаго Макарія Великаго, къ Богу Отцу
Боже вѣчный и Царю всякаго созданія, сподобивый мя даже въ часъ сей доспѣти, прости ми грѣхи, яже сотворихъ въ сей день дѣломъ, словомъ и помышленіемъ, и очисти, Господи, смиренную мою душу отъ всякія скверны плоти и духа. И даждь ми, Господи, въ нощи сей сонъ прейти въ мирѣ, да воставъ отъ смиреннаго ми ложа, благоугожду пресвятому имени Твоему, во вся дни живота моего, и поперу борющiя мя враги плотскія и безплотныя. И избави мя, Господи, отъ помышленій суетныхъ, оскверняющихъ мя, и похотей лукавыхъ. Яко Твое есть царство, и сила и слава, Отца и Сына и Святаго Духа, нынѣ и присно и во вѣки вѣковъ. Аминь.

Молитва 2-я, святаго Антиоха, ко Господу нашему Іисусу Христу
Вседержителю, Слово Отчее, Самъ совершенъ сый, Іисусе Христе, многаго ради милосердія Твоего никогдаже отлучайся мене, раба Твоего, но всегда во мнѣ почивай. Іисусе, добрый Пастырю Твоихъ овецъ, не предаждь мене крамолѣ змiинѣ, и желанію сатанину не остави мене, яко сѣмя тли во мнѣ есть. Ты убо, Господи Боже покланяемый, Царю Святый, Іисусе Христе, спяща мя сохрани немерцающимъ свѣтомъ, Духомъ Твоимъ Святымъ, Имже освятилъ еси Твоя ученики. Даждь, Господи, и мнѣ, недостойному рабу Твоему, спасеніе Твое на ложи моемъ: просвѣти умъ мой свѣтомъ разума святаго Евангелія Твоего, душу любовію Креста Твоего, сердце чистотою словесе Твоего, тѣло мое Твоею страстію безстрастною, мысль мою Твоимъ смиреніемъ сохрани, и воздвигни мя во время подобно на Твое славословіе. Яко препрославленъ еси со Безначальнымъ Твоимъ Отцемъ и съ Пресвятымъ Духомъ во вѣки. Аминь.

Молитва 3- я, ко Пресвятому Духу
Господи, Царю Небесный, Утѣшителю, Душе истины, умилосердися и помилуй мя грѣшнаго раба Твоего, и отпусти ми недостойному, и прости вся, елика Ти согрешихъ днесь яко человѣкъ, паче же и не яко человѣкъ, но и горее скота, вольныя моя грѣхи и невольныя, вѣдомыя и невѣдомыя: яже отъ юности и науки злы, и яже суть отъ нагльства и унынія. Аще именемъ Твоимъ кляхся, или похулихъ е въ помышленіи моемъ; или кого укорихъ; или оклеветахъ кого гнѣвомъ моимъ, или опечалихъ, или о чемъ прогнѣвахся; или солгахъ, или безгодно спахъ, или нищъ прiиде ко мнѣ, и презрехъ его; или брата моего опечалихъ, или свадихъ, или кого осудихъ; или развеличахся, или разгордѣхся, или разгнѣвахся; или стоящу ми на молитвѣ, умъ мой о лукавствiи міра сего подвижеся, или развращеніе помыслихъ; или объядохся, или опихся, или безъ ума смѣяхся; или лукавое помыслихъ, или доброту чуждую видѣвъ, и тою уязвленъ быхъ сердцемъ; или неподобная глаголахъ, или грѣху брата моего посмѣяхся, моя же суть безчисленная согрѣшенія; или о молитвѣ не радихъ, или ино что содѣяхъ лукавое, не помню, та бо вся и больша сихъ содѣяхъ. Помилуй мя, Творче мой Владыко, унылаго и недостойнаго раба Твоего, и остави ми, и отпусти, и прости мя, яко Благъ и Человѣколюбецъ, да съ миромъ лягу, усну и почію, блудный, грѣшный и окаянный азъ, и поклонюся, и воспою, и прославлю пречестное имя Твое, со Отцемъ, и Единороднымъ Его Сыномъ, нынѣ и присно и во вѣки. Аминь.

Молитва 4-я, святаго Макарія Великаго
Что Ти принесу, или что Ти воздамъ, великодаровитый Безсмертный Царю, щедре и человѣколюбче Господи, яко ленящася мене на Твое угожденіе, и ничтоже благо сотворша, привелъ еси на конецъ мимошедшаго дне сего, обращеніе и спасеніе души моей строя? Милостивъ ми буди грѣшному и обнаженному всякаго дѣла блага, возстави падшую мою душу, осквернившуюся въ безмѣрныхъ согрѣшенiихъ, и отыми отъ мене весь помыслъ лукавый видимаго сего житія. Прости моя согрѣшенія, едине Безгрѣшне, яже Ти согрѣшихъ въ сей день, вѣдѣніемъ и невѣдѣніемъ, словомъ, и дѣломъ, и помышленіемъ, и всѣми моими чувствы. Ты Самъ, покрывая, сохрани мя отъ всякаго сопротивнаго обстоянія Божественною Твоею властію, и неизреченнымъ человѣколюбіемъ, и силою. Очисти, Боже, очисти множество грѣховъ моихъ. Благоволи, Господи, избавити мя отъ сѣти лукаваго, и спаси страстную мою душу, и осѣни мя свѣтомъ лица Твоего, егда приидеши во славѣ, и неосужденна нынѣ сномъ уснути сотвори, и безъ мечтанія, и несмущенъ помыслъ раба Твоего соблюди, и всю сатанину дѣтель отжени отъ мене, и просвѣти ми разумныя очи сердечныя, да не усну въ смерть. И посли ми Ангела мирна, хранителя и наставника души и тѣлу моему, да избавитъ мя отъ врагъ моихъ; да воставъ со одра моего, принесу Ти благодарственныя мольбы. Ей, Господи, услыши мя грѣшнаго и убогаго раба Твоего, изволеніемъ и совѣстію; даруй ми воставшу словесемъ Твоимъ поучитися, и уныніе бѣсовское далече отъ мене отгнано быти сотвори Твоими Ангелы; да благословлю имя Твое святое, и прославлю, и славлю Пречистую Богородицу Марію, Юже далъ еси намъ грѣшнымъ заступленіе, и пріими Сію молящуюся за ны; вѣмъ бо, яко подражаетъ Твое человѣколюбіе, и молящися не престаетъ. Тоя заступленіемъ, и Честнаго Креста знаменіемъ, и всѣхъ святыхъ Твоихъ ради, убогую душу мою соблюди, Іисусе Христе Боже нашъ, яко Святъ еси, и препрославленъ во вѣки. Аминь.

Молитва 5-я
Господи Боже нашъ, еже согрѣшихъ во дни семъ словомъ, дѣломъ и помышленіемъ, яко Благъ и Человѣколюбецъ прости ми. Миренъ сонъ и безмятеженъ даруй ми. Ангела Твоего хранителя посли, покрывающа и соблюдающа мя отъ всякаго зла, яко Ты еси хранитель душамъ и тѣлесемъ нашимъ, и Тебѣ славу возсылаемъ, Отцу и Сыну и Святому Духу, нынѣ и присно и во вѣки вѣковъ. Аминь.

Молитва 6-я
Господи Боже нашъ, въ Негоже вѣровахомъ, и Егоже имя паче всякаго имене призываемъ, даждь намъ, ко сну отходящимъ, ослабу души и тѣлу, и соблюди насъ отъ всякаго мечтанія, и темныя сласти кромѣ; устави стремленіе страстей, угаси разжженiя востанiя тѣлеснаго. Даждь намъ цѣломудреннѣ пожити дѣлы и словесы; да добродѣтельное жительство воспрiемлюще, обѣтованныхъ не отпадемъ благихъ Твоихъ, яко благословенъ еси во вѣки. Аминь.

Молитва 7-я, святаго Іоанна Златоуста
(24 молитвы, по числу часовъ дня и ночи)
Дневныя
1. Господи, не лиши мене небесныхъ Твоихъ благъ.
2. Господи, избави мя вѣчныхъ мукъ.
3. Господи, умомъ ли или помышленіемъ, словомъ или дѣломъ согрѣшихъ, прости мя.
4. Господи, избави мя всякаго невѣдѣнія и забвенія, и малодушія, и окамененнаго нечувствія.
5. Господи, избави мя отъ всякаго искушенія.
6. Господи, просвѣти мое сердце, еже помрачи лукавое похотѣніе.
7. Господи, азъ яко человѣкъ согрѣшихъ, Ты же яко Богъ щедръ, помилуй мя, видя немощь души моея.
8. Господи, посли благодать Твою въ помощь мнѣ, да прославлю имя Твое святое.
9. Господи Іисусе Христе, напиши мя раба Твоего въ книзѣ животнѣй и даруй ми конецъ благій.
10. Господи, Боже мой, аще и ничтоже благо сотворихъ предъ Тобою, но даждь ми по благодати Твоей положити начало благое.
11. Господи, окропи въ сердцѣ моемъ росу благодати Твоея.
12. Господи небесе и земли, помяни мя грѣшнаго раба Твоего, студнаго и нечистаго, во Царствіи Твоемъ. Аминь..

Нощныя
1. Господи, въ покаяніи пріими мя.
2. Господи, не остави мене.
3. Господи, не введи мене въ напасть.
4. Господи, даждь ми мысль благу.
5. Господи, даждь ми слезы и память смертную, и умиленіе.
6. Господи, даждь ми помыслъ исповѣданія грѣховъ моихъ.
7. Господи, даждь ми смиреніе, цѣломудріе и послушаніе.
8. Господи, даждь ми терпѣніе, великодушіе и кротость.
9. Господи, всели въ мя корень благихъ, страхъ Твой въ сердце мое.
10 Господи, сподоби мя любити Тя отъ всея души моея и помышленія и творити во всемъ волю Твою.
11. Господи, покрый мя отъ человѣкъ нѣкоторыхъ, и бѣсовъ, и страстей, и отъ всякія иныя неподобныя вещи.
12. Господи, вѣси, яко творши, якоже Ты волиши, да будетъ воля Твоя и во мнѣ грѣшнѣмъ, яко благословенъ еси во вѣки. Аминь.

Молитва 8-я, ко Господу нашему Іисусу Христу:
Господи Іисусе Христе, Сыне Божій, ради честнѣйшія Матере Твоея, и безплотныхъ Твоихъ Ангелъ, Пророка же и Предтечи и Крестителя Твоего, богоглаголивыхъ же Апостолъ, свѣтлыхъ и добропобѣдныхъ мученикъ, преподобныхъ и богоносныхъ отецъ, и всѣхъ святыхъ молитвами, избави мя настоящаго обстоянія бѣсовскаго. Ей, Господи мой и Творче, не хотяй смерти грѣшнаго, но якоже обратитися и живу быти ему, даждь и мнѣ обращеніе окаянному и недостойному; изми мя отъ устъ пагубнаго змія, зіяющаго пожрети мя и свести во адъ жива. Ей, Господи мой, утѣшеніе мое, Иже мене ради окаяннаго въ тлѣнную плоть оболкiйся, исторгни мя отъ окаянства, и утѣшеніе подаждь души моей окаяннѣй. Всади въ сердце мое творити Твоя повелѣнія, и оставити лукавая дѣянія, и получити блаженства Твоя: на Тя бо, Господи, уповахъ, спаси мя.

Молитва 9-я, ко Пресвятѣй Богородице Петра Студийскаго::
Къ Тебѣ Пречистѣй Божіей Матери азъ окаянный припадая молюся: вѣси, Царице, яко безпрестани согрѣшаю и прогнѣвляю Сына Твоего и Бога моего, и многажды аще каюся, ложъ предъ Богомъ обрѣтаюся, и каюся трепеща: неужели Господь поразитъ мя, и по часѣ паки таяжде творю; вѣдущи сія, Владычице моя Госпоже Богородице, молю, да помилуеши, да укрѣпиши, и благая творити да подаси ми. Вѣси бо, Владычице моя Богородице, яко отнюдъ имамъ въ ненависти злая моя дѣла, и всею мыслію люблю законъ Бога моего; но не вѣмъ, Госпоже Пречистая, откуду яже ненавижду, та и люблю, а благая преступаю. Не попущай, Пречистая, воли моей совершатися, не угодна бо есть, но да будетъ воля Сына Твоего и Бога моего: да мя спасетъ, и вразумитъ, и подастъ благодать Святаго Духа, да быхъ азъ отселѣ престалъ сквернодѣйства, и прочее пожилъ быхъ въ повелѣніи Сына Твоего, Емуже подобаетъ всякая слава, честь и держава, со Безначальнымъ Его Отцемъ, и Пресвятымъ и Благимъ и Животворящимъ Его Духомъ, нынѣ и присно, и во вѣки вѣковъ. Aминь.

Молитва 10-я, ко Пресвятѣй Богородице:
Благаго Царя благая Мати, Пречистая и Благословенная Богородице Марiе, милость Сына Твоего и Бога нашего излей на страстную мою душу и Твоими молитвами настави мя на дѣянія благая, да прочее время живота моего безъ порока прейду и Тобою рай обрящу, Богородице Дѣво, едина Чистая и Благословенная.

Молитва 11-я, ко ко святому Ангелу хранителю:
Ангеле Христовъ, хранителю мой святый и покровителю души и тѣла моего, вся ми прости, елика согрѣшихъ во днешнiй день, и отъ всякаго лукавствiя противнаго ми врага избави мя, да ни въ коемже грѣсѣ прогнѣваю Бога моего; но моли за мя грѣшнаго и недостойнаго раба, яко да достойна мя покажеши благости и милости Всесвятыя Троицы и Матере Господа моего Іисуса Христа и всѣхъ святыхъ. Аминь.

Кондакъ Богородицѣ:
Взбранной Воеводѣ побѣдительная, яко избавльшеся отъ злыхъ, благодарственная восписуемъ Ти раби Твои, Богородице, но яко имущая державу непобѣдимую, отъ всякихъ насъ бѣдъ свободи, да зовемъ Ти; радуйся, Невѣсто Неневѣстная.
Преславная Приснодѣво, Мати Христа Бога, принеси нашу молитву Сыну Твоему и Богу нашему, да спасетъ Тобою души наша.
Все упованіе мое на Тя возлагаю, Мати Божія, сохрани мя подъ кровомъ Твоимъ.
Богородице Дѣво, не презри мене, грѣшнаго, требующа Твоея помощи и Твоего заступленія, на Тя бо упова душа моя, и помилуй мя.

Молитва святаго Iоанникiя
Упованіе мое Отецъ, прибѣжище мое Сынъ, покровъ мой Духъ Святый: Троице Святая, слава Тебѣ.
Достойно есть яко воистинну блажити Тя, Богородицу, Присноблаженную и Пренепорочную и Матерь Бога нашего. Честнѣйшую Херувимъ и славнѣйшую безъ сравненія Серафимъ, безъ истлѣнія Бога Слова рождшую, сущую Богородицу Тя величаемъ.

Слава, и нынѣ: Господи, помилуй. (Трижды)

Господи Іисусе Христе, Сыне Божій, молитвъ ради Пречистыя Твоея Матере, преподобныхъ и богоносныхъ отецъ нашихъ и всѣхъ святыхъ, помилуй насъ. Аминь.

Молитва святаго Іоанна Дамаскина, юже, указуя на одръ твой, глаголи:
Владыко Человѣколюбче, не ужели мнѣ одръ сей гробъ будетъ, или еще окаянную мою душу просвѣтиши днемъ? Се ми гробъ предлежитъ, се ми смерть предстоитъ. Суда Твоего, Господи, боюся и муки безконечныя, злое же творя не престаю: Тебе Господа Бога моего всегда прогнѣвляю, и Пречистую Твою Матерь, и вся Небесныя Силы, и святаго Ангела хранителя моего. Вѣмъ убо, Господи, яко недостоинъ есмь человѣколюбія Твоего, но достоинъ есмь всякаго осужденія и муки. Но, Господи, или хощу, или не хощу, спаси мя. Аще бо праведника спасеши, ничтоже велiе; и аще чистаго помилуеши, ничтоже дивно: достойни бо суть милости Твоея. Но на мнѣ грѣшнѣмъ удиви милость Твою: о семъ яви человѣколюбіе Твое, да не одолѣетъ моя злоба Твоей неизглаголаннѣй благости и милосердію: и якоже хощеши, устрой о мнѣ вещь.

И тако хотяй возлещи на одрѣ, глаголи сіе:
Просвѣти очи мои, Христе Боже, да не когда усну въ смерть, да не когда речетъ врагъ мой: укрѣпихся на него.
Слава: Заступникъ души моея буди, Боже, яко посредѣ хожду сѣтей многихъ; избави мя отъ нихъ и спаси мя, Блаже, яко Человѣколюбецъ.
И нынѣ: Преславную Божію Матерь, и святыхъ Ангелъ Святѣйшую, немолчно воспоимъ сердцемъ и усты, Богородицу сію исповѣдающе, яко воистинну рождшую намъ Бога воплощенна, и молящуюся непрестанно о душахъ нашихъ.

Таже цѣлуй кресть твой, и знаменай крестомъ мѣсто твое оть главы до ногъ, такожде и оть всѣхъ странъ, глаголя молитву Честному Кресту:
Да воскреснетъ Богъ, и расточатся врази Его, и да бѣжатъ отъ лица Его ненавидящiи Его. Яко исчезаетъ дымъ, да исчезнутъ; яко таетъ воскъ отъ лица огня, тако да погибнутъ бѣси отъ лица любящихъ Бога и знаменующихся крестнымъ знаменіемъ, и въ веселіи глаголющихъ: радуйся, Пречестный и Животворящій Кресте Господень, прогоняяй бѣсы силою на тебѣ пропятаго Господа нашего Іисуса Христа, во адъ сшедшаго и поправшаго силу дiаволю, и даровавшаго намъ тебѣ Крестъ Свой Честный на прогнанiе всякаго супостата. О, Пречестный и Животворящій Кресте Господень! Помогай ми со Святою Госпожею Дѣвою Богородицею и со всѣми святыми во вѣки. Аминь.

Или кратко:
Огради мя, Господи, силою Честнаго и Животворящаго Твоего Креста, и сохрани мя отъ всякаго зла.

Молитва
Ослаби, остави, прости, Боже, прегрѣшенія наша, вольная и невольная, яже въ словѣ и въ дѣлѣ, яже въ вѣдѣніи и не въ вѣдѣніи, яже во дни и въ нощи, яже во умѣ и въ помышленіи: вся намъ прости, яко Благъ и Человѣколюбецъ.

Молитва
Ненавидящихъ и обидящихъ насъ прости, Господи Человѣколюбче. Благотворящимъ благосотвори. Братіямъ и сродникомъ нашимъ даруй яже ко спасенію прошенія и жизнь вѣчную. Въ немощехъ сущія посѣти и исцѣленіе даруй. Иже на мори управи. Путешествующимъ спутешествуй. Служащимъ и милующимъ насъ грѣховъ оставленіе даруй. Заповѣдавшихъ намъ недостойнымъ молитися о нихъ помилуй по велицѣй Твоей милости. Помяни, Господи, прежде усопшихъ отецъ и братій нашихъ и упокой ихъ, идѣже присѣщаетъ свѣтъ лица Твоего. Помяни, Господи, братій нашихъ плѣненныхъ и избави я отъ всякаго обстоянія. Помяни, Господи, плодоносящихъ и добродѣлающихъ во святыхъ Твоихъ церквахъ, и даждь имъ яже ко спасенію прошенія и жизнь вѣчную. Помяни, Господи, и насъ, смиренныхъ и грѣшныхъ и недостойныхъ рабъ Твоихъ, и просвѣти нашъ умъ свѣтомъ разума Твоего, и настави насъ на стезю заповѣдей Твоихъ, молитвами Пречистыя Владычицы нашея Богородицы и Приснодѣвы Маріи и всѣхъ Твоихъ святыхъ: яко благословенъ еси во вѣки вѣковъ. Аминь.

Исповѣданіе грѣховъ повседневное
Исповѣдаю Тебѣ Господу Богу моему и Творцу, во Святѣй Троицѣ Единому, славимому и покланяемому, Отцу и Сыну и Святому Духу, вся моя грѣхи, яже содеяхъ во вся дни живота моего, и на всякій часъ, и въ настоящее время, и въ прешедшiя дни и нощи, дѣломъ, словомъ, помышленіемъ, объяденіемъ, піянствомъ, тайнояденiемъ, празднословіемъ, уныніемъ, лѣностію, прекословіемъ, непослушаніемъ, оклеветанiемъ, осужденіемъ, небреженіемъ, самолюбіемъ, многостяжаніемъ, хищеніемъ, неправдоглаголаншемъ, скверноприбытчествомъ, мшелоимствомъ, ревнованшемъ, завистію, гнѣвомъ, памятозлобіемъ, ненавистію, лихоимствомъ и всѣми моими чувствы: зрѣніемъ, слухомъ, обоняніемъ, вкусомъ, осязаніемъ и прочими моими грѣхи, душевными вкупѣ и тѣлесными, имиже Тебе Бога моего и Творца прогнѣвахъ, и ближняго моего онеправдовахъ: о сихъ жалѣя, винна себе Тебѣ Богу моему представляю, и имѣю волю каятися: точiю, Господи Боже мой, помози ми, со слезами смиренно молю Тя: прешедшая же согрѣшенія моя милосердіемъ Твоимъ прости ми, и разрѣши отъ всѣхъ сихъ, яже изглаголахъ предъ Тобою, яко Благъ и Человѣколюбецъ.

Когда отходишь ко сну, произноси:
Въ руцѣ Твои, Господи Іисусе Христе, Боже мой, предаю духъ мой: Ты же мя благослови, Ты мя помилуй и животъ вѣчный даруй ми. Аминь.



«Вернуться къ оглавленiю Часы Святыя Пасхи»

Молитвенная помощь
      Просимъ молитвъ нашихъ читателей о здравіи и спасении души іеромонаха Митрофана, іеромонаха Варѳоломея, протоіерея Владиміра, іерея Бориса, iерея Алексѣя, рабовъ Божiихъ Виктора, Максима, Сергия, Галины, Елены, Татианы и всехъ Православныхъ Христианъ.

  Авторъ проекта Викторъ Богучаровъ .

  © 2008–2010, «Бесѣда въ храмѣ» .