Беседа въ храме

О проектѣ
Новости
Афиша
Бесѣда въ храмѣ
Библiотека
Благотворительность
Церковная лавка
Ссылки


Электронная почта




.

Моленіе объ упокоеніи православныхъ воиновъ, за вѣру и Отечество на полѣ брани убіенныхъ.

      Непобѣдимый, непостижимый и крѣпкій во бранехъ Господи Боже нашъ! Ты, по неисповѣдимымъ судьбамъ Своимъ, овому посылаеши Ангела смерти подъ кровомъ его, овому на селѣ, овому на мори, овомуже на полѣ брани отъ оружiй бранныхъ, изрыгающихъ страшныя и смертоносныя силы, разрушающія тѣлеса, расторгающія члены и сокрущающiя кости ратующихъ; вѣруемъ, яко по Твоему, Господи, премудрому смотрѣнію, такову пріемлютъ смерть защитники Вѣры и Отечества.
      Молимъ Тя, Преблагiй Господи, помяни во Царствіи Твоемъ православныхъ воиновъ на брани убіенныхъ и пріими ихъ въ небесный чертогъ Твой, яко мучениковъ изъязвленныхъ, обагренныхъ своею кровію, яко пострадавшихъ за Святую Церковь Твою и за Отечество, еже благословилъ еси, яко достояніе Свое.
      Молимъ Тя, пріими убо отошедшихъ къ Тебѣ воиновъ въ сонмы воевъ Небесныхъ силъ, пріими ихъ милостію Твоею, яко павшихъ во брани за независимость земли Русскія отъ ига невѣрныхъ, яко защищавшихъ отъ враговъ Вѣру Православную, защищавшихъ Отечество въ тяжкія годины отъ иноплеменныхъ полчищъ; помяни, Господи, всѣхъ, добрымъ подвигомъ подвизавшихся за древлехранимое Апостольское Православіе, за освященную и въ языкъ святъ избранную Тобою землю Русскую, въ нюже враги Креста и Православія приношаху и огнь, и мечъ. Пріими съ миромъ души рабъ Твоихъ (имена), воинствовавшихъ за благоденствіе наше, за миръ и покой нашъ и подаждь имъ вѣчное упокоеніе, яко спасавшимъ грады и вѣси и ограждавшимъ собою Отечество, и помилуй павшихъ на брани православныхъ воиновъ Твоимъ милосердіемъ, прости имъ вся согрѣшенія, въ житіи семъ содѣянная словомъ, дѣломъ, вѣдѣніемъ и невѣдѣніемъ. Призри благосердiемъ Твоимъ, о Премилосердый Господи, на раны ихъ, мученія, стенанія и страданія, и вмѣни имъ вся сія въ подвигъ добрый и Тебѣ благоугодный; пріими ихъ милостію Твоею, зане лютыя скорби и тяготу зде прияша, въ нуждехъ, тѣснотѣ, въ трудехъ и бдѣніяхъ быша, гладъ и жажду, изнуреніе и изнеможеніе претерпеша, вменяеми быша яко овцы заколенія. Молимъ Тя, Господи, да будутъ раны ихъ врачевствомъ и елеемъ, возлияннымъ на грѣховныя язвы ихъ.
      Призри съ небесе, Боже, и виждь слезы сирыхъ, лишившихся отцевъ своихъ, и пріими умиленныя о нихъ мольбы сыновъ и дщерей ихъ; услыши молитвенныя воздыханія отцевъ и матерей, лишившихся чадъ своихъ; услыши благоутробне Господи, неутѣшныхъ вдовицъ, лишившихся супруговъ своихъ; братіи и сестръ, плачущихъ о своихъ присныхъ, — и помяни мужей, убіенныхъ въ крѣпости силъ и во цвѣтѣ лѣтъ, старцевъ въ силѣ духа и мужества; воззри на сердечныя скорби наша, виждь сѣтованіе наше и умилосердися, Преблагiй, къ молящимся Тебѣ, Господи! Ты отъялъ еси отъ насъ присныхъ нашихъ, но не лиши насъ Твоея милости; услыши молитву нашу и прими милостиво отошедшихъ къ Тебѣ приснопоминаемыхъ нами рабовъ Твоихъ (имена); воззови ихъ въ чертогъ Твой, яко доблихъ воиновъ, положившихъ животъ свой за Вѣру и Отечество на поляхъ сраженій; пріими ихъ въ сонмы избранныхъ Твоихъ, яко послужившихъ Тебѣ вѣрою и правдою, и упокой ихъ во Царствіе Твоемъ, яко мучениковъ, отошедшихъ къ Тебѣ израненными, изъязвленными и въ страшныхъ мученіяхъ предавшими духъ свой; всели во святый Твой градъ всѣхъ приснопоминаемыхъ рабовъ Твоихъ (имена), яко воиновъ доблихъ, мужественно подвизавшихся въ страшныхъ приснопамятныхъ намъ браняхъ; облецы ихъ тамо въ виссонъ свѣтелъ и чистъ, яко зде убѣлившихъ ризы своя въ крови своей и вѣнцовъ мученическихъ сподоби; сотвори ихъ купно участниками въ торжествѣ и славѣ побѣдителей, ратоборствовавшихъ подъ знаменемъ Креста Твоего съ міромъ, плотію и діаволомъ; водвори ихъ въ сонмѣ славныхъ Страстотерпцевъ, добропобѣдныхъ Мучениковъ, Праведныхъ и всѣхъ Святыхъ Твоихъ. Аминь.



«Вернуться къ оглавленiю


Молитвенная помощь
      Просимъ молитвъ нашихъ читателей о здравіи и спасении души іеромонаха Митрофана, іеромонаха Варѳоломея, протоіерея Владиміра, іерея Бориса, iерея Алексѣя, рабовъ Божiихъ Виктора, Максима, Сергия, Галины, Елены, Татианы и всехъ Православныхъ Христианъ.

  Авторъ проекта Викторъ Богучаровъ .

  © 2008–2010, «Бесѣда въ храмѣ» .