Беседа въ храме

О проектѣ
Новости
Афиша
Бесѣда въ храмѣ
Библiотека
Благотворительность
Церковная лавка
Ссылки


Электронная почта




.

Канонъ покаяный ко Господу нашему Іисусу Христу.


Молитвами святыхъ отецъ нашихъ, Господи Іисусе Христе Боже нашъ, помилуй насъ, аминь.
Слава Тебѣ, Боже нашъ, слава Тебѣ.

Царю небесный, Трисвятое, и по Отче нашъ: Господи, помилуй (12 разъ), Слава, и нынѣ: Пріидите, поклонимся: (Трижды), псаломъ 50-й. (1)

Гласъ 6-й. Пѣснь 1.
Ирмось: Яко по суху пѣшешествовавъ Израиль, по безднѣ стопами, гонителя фараона видя потопляема, Богу побѣдную пѣснь поимъ, вопiяше.

Припѣвъ: Помилуй мя, Боже, помилуй мя. (2)

Нынѣ приступихъ азъ грѣшный и обремененный къ Тебѣ, Владыцѣ и Богу моему; не смѣю же взирати на небо, токмо молюся, глаголя: даждь ми, Господи, умъ, да плачуся дѣлъ моихъ горько.

Припѣвъ: Помилуй мя, Боже, помилуй мя.

О, горе мнѣ грѣшному! Паче всѣхъ человѣкъ окаяненъ есмь, покаянія нѣсть во мнѣ; даждь ми, Господи, слезы, да плачуся дѣлъ моихъ горько.

Слава: Безумне, окаянне человѣче, въ лѣности время губиши; помысли житіе твое, и обратися ко Господу Богу, и плачися о дѣлѣхъ твоихъ горько.

И нынѣ: Мати Божія Пречистая, воззри на мя грѣшнаго, и отъ сѣти дiаволи избави мя, и на путь покаянія настави мя, да плачуся дѣлъ моихъ горько.

Пѣснь 3.
Ирмось: Нѣсть святъ, якоже Ты, Господи Боже мой, вознесый рогъ вѣрныхъ Твоихъ, Блаже, и утвердивый насъ на камени исповѣданія Твоего.
      Внегда поставлени будутъ престоли на Судищи Страшнѣмъ, тогда всѣхъ человѣкъ дѣла обличатся; горе тамо будетъ грѣшнымъ, въ муку отсылаемымъ; и то вѣдущи, душе моя, покайся отъ злыхъ дѣлъ твоихъ.
      Праведницы возрадуются, а грѣшнiи восплачутся, тогда никтоже возможетъ помощи намъ, но дѣла наша осудятъ насъ, темже прежде конца покайся отъ злыхъ дѣлъ твоихъ.

Слава: Увы мнѣ великогрѣшному, иже дѣлы и мысльми осквернився, ни капли слезъ имѣю отъ жестосердiя; нынѣ возникни отъ земли, душѣ моя, и покайся отъ злыхъ дѣлъ твоихъ.

И нынѣ: Се, взываетъ, Госпожѣ, Сынъ Твой, и поучаетъ насъ на доброе, азъ же грѣшный добра всегда бѣгаю; но Ты, Милостивая, помилуй мя, да покаюся отъ злыхъ моихъ дѣлъ.

Сѣдаленъ, гласъ 6-й.
Помышляю день страшный и плачуся дѣяній моихъ лукавыхъ: како отвѣщаю Безсмертному Царю, или коимъ дерзновеніемъ воззрю на Судію, блудный азъ? Благоутробный Отче, Сыне Единородный и Душе Святый, помилуй мя.

Слава, и нынѣ: Богородиченъ:.
Связанъ многими нынѣ пленицами грѣховъ и содержимь лютыми страстьми и бѣдами, къ Тебѣ прибѣгаю, моему спасенію, и вопію: помози ми, Дѣво, Мати Божія.

Пѣснь 4.
Ирмось: Христосъ моя сила, Богъ и Господь, честная Церковь боголѣпно поетъ, взывающи отъ смысла чиста, о Господѣ празднующи.
      Широкъ путь здѣ и угодный сласти творити, но горько будетъ въ послѣдній день, егда душа отъ тѣла разлучатися будетъ: блюдися отъ сихъ, человѣче, Царствія ради Божія.
      Почто убогаго обидиши, мзду наемничу удержуеши, брата твоего не любиши, блудъ и гордость гониши? Остави убо сія, душе моя, и покайся Царствія ради Божія.

Слава: О, безумный человѣче, доколѣ углѣбаеши, яко пчела, собирающи богатство твое? Вскорѣ бо погибнетъ, яко прахъ и пепелъ: но болѣе взыщи Царствія Божія.

И нынѣ: Госпоже Богородице, помилуй мя грѣшнаго, и въ добродѣтели укрѣпи, и соблюди мя, да наглая смерть не похититъ мя неготоваго, и доведи мя, Дѣво, Царствія Божія.

Пѣснь 5.
Ирмось: Божіимъ свѣтомъ Твоимъ, Блаже, утренюющихъ Ти души любовію озари, молюся, Тя вѣдѣти, Слове Божій, истиннаго Бога, отъ мрака грѣховнаго взывающа.
      Воспомяни, окаянный человѣче, како лжамъ, клеветамъ, разбою, немощемъ, лютымъ звѣремъ, грѣховъ ради порабощенъ еси; душе моя грѣшная, того ли восхотѣла еси?
      Трепещутъ ми уди, всѣми бо сотворихъ вину: очима взираяй, ушима слышай, языкомъ злая глаголяй, всего себе геенѣ предаяй; душе моя грѣшная, сего ли восхотѣла еси?

Слава: Блудника и разбойника кающася пріялъ еси, Спасе, азъ же единъ лѣностію грѣховною отягчихся и злымъ дѣломъ поработихся, душе моя грѣшная, сего ли восхотѣла еси?

И нынѣ: Дивная и скорая помощнице всѣмъ человѣкомъ, Мати Божія, помози мнѣ недостойному, душа бо моя грѣшная того восхотѣ.

Пѣснь 6.
Ирмось: Житейское море, воздвизаемое зря напастей бурею, къ тихому пристанищу Твоему притекъ, вопію Ти: возведи отъ тли животъ мой, Многомилостиве.
      Житіе на земли блудно пожихъ и душу во тьму предахъ, нынѣ убо молю Тя, Милостивый Владыко: свободи мя отъ работы сея вражія, и даждь ми разумъ творити волю Твою.
     Кто творитъ таковая, якоже азъ? Якоже бо свиния лежитъ въ калу, тако и азъ грѣху служу. Но Ты, Господи, исторгни мя отъ гнуса сего и даждь ми сердце творити заповѣди Твоя.

Слава: Воспряни, окаянный человѣче, къ Богу, воспомянувъ своя согрѣшенія, припадая ко Творцу, слезя и стеня; Той же, яко милосердъ, дастъ ти умъ знати волю Свою.

И нынѣ: Богородице Дѣво, отъ видимаго и невидимаго зла сохрани мя, Пречистая, и пріими молитвы моя, и донеси я Сыну Твоему, да дастъ ми умъ творити волю Его.

Кондакъ.
Душе моя, почто грѣхами богатѣеши, почто волю дiаволю твориши, въ чесомъ надежду полагаеши? Престани отъ сихъ и обратися къ Богу съ плачемъ, зовущи: милосерде Господи, помилуй мя грѣшнаго.

Икосъ.
Помысли, душе моя, горькій часъ смерти и страшный судъ Творца твоего и Бога: Ангели бо грознiи поймутъ тя, душе, и въ вѣчный огнь введутъ: убо прежде смерти покайся, вопiюще: Господи, помилуй мя грѣшнаго.

Пѣснь 7.
Ирмось: Росодательну убо пещь содѣла Ангелъ преподобнымъ отрокомъ, халдеи же опаляющее велѣніе Божіе, мучителя увѣща вопити: благословенъ еси, Боже отецъ нашихъ.
      Не надѣйся, душе моя, на тлѣнное богатство и на неправедное собраніе, вся бо сія не вѣси кому оставиши, но возопiй: помилуй мя, Христе Боже, недостойнаго.
      Не уповай, душе моя, на тѣлесное здравіе и на скоромимоходящую красоту, видиши бо, яко сильнiи и младiи умираютъ; но возопiй: помилуй мя, Христе Боже, недостойнаго.

Слава: Воспомяни, душе моя, вѣчное житіе, Царство Небесное, уготованное святымъ, и тьму кромѣшную и гнѣвъ Божій злымъ, и возопiй: помилуй мя, Христе Боже, недостойнаго.

И нынѣ: Припади, душе моя, къ Божіей Матери и помолися Той, есть бо скорая помощница кающимся, умолитъ Сына Христа Бога, и помилуетъ мя недостойнаго.

Пѣснь 8.
Ирмось: Изъ пламене преподобнымъ росу источилъ еси и праведнаго жертву водою попалилъ еси: вся бо твориши, Христе, токмо еже хотѣти. Тя превозносимъ во вся вѣки.
      Како не имамъ плакатися, егда помышляю смерть, видѣхъ бо во гробѣ лежаща брата моего, безславна и безобразна? Что убо чаю, и на что надѣюся? Токмо даждь ми, Господи, прежде конца покаяніе. (Дважды)

Слава: Вѣрую, яко прiидеши судити живыхъ и мертвыхъ, и вси во своемъ чину станутъ, старiи и младiи, владыки и князи, дѣвы и священницы; гдѣ обрящуся азъ? Сего ради вопію: даждь ми, Господи, прежде конца покаяніе.

И нынѣ: Пречистая Богородице, пріими недостойную молитву мою и сохрани мя отъ наглыя смерти, и даруй ми прежде конца покаяніе.

Пѣснь 9.
Ирмось: Бога человѣкомъ невозможно видѣти, на Негоже не смѣютъ чини Ангельстiи взирати; Тобою же, Всечистая, явися человѣкомъ Слово Воплощенно, Егоже величающе, съ небесными вои Тя ублажаемъ.
      Нынѣ къ вамъ прибѣгаю, Ангели, Архангели и вся небесныя силы, у Престола Божія стоящіе, молитеся ко Творцу своему, да избавитъ душу мою отъ муки вѣчныя.
      Нынѣ плачуся къ вамъ, святiи патрiарси, царiе и пророцы, апостоли и святители и вси избраннiи Христовы: помозите ми на судѣ, да спасетъ душу мою отъ силы вражія.

Слава: Нынѣ къ вамъ воздѣжу руцѣ, святiи мученицы, пустынницы, дѣвственницы, праведницы и вси святiи, молящiися ко Господу за весь мiръ, да помилуетъ мя въ часъ смерти моея.

И нынѣ: Мати Божія, помози ми, на Тя сильнѣ надѣющемуся, умоли Сына Своего, да поставитъ мя недостойнаго одесную Себѣ, егда сядетъ судяй живыхъ и мертвыхъ. Аминь.

Молитва.
      Владыко Христе Боже, Иже страстьми Своими страсти моя исцѣливый и язвами Своими язвы моя уврачевавый, даруй мнѣ, много Тебѣ прегрѣшившему, слезы умиленія; сраствори моему тѣлу отъ обонянія Животворящаго Тѣла Твоего, и наслади душу мою Твоею Честною Кровію отъ горести, еюже мя сопротивникъ напои; возвыси мой умъ къ Тебѣ, долу поникшій, и возведи отъ пропасти погибели: яко не имамъ покаянія, не имамъ умиленія, не имамъ слезы утѣшительныя, возводящія чада ко своему наслѣдію. Омрачихся умомъ въ житейскихъ страстехъ, не могу воззрѣти къ Тебѣ въ болѣзни, не могу согрѣтися слезами, яже къ Тебѣ любве. Но, Владыко Господи Іисусе Христе, сокровище благихъ, даруй мнѣ покаяніе всецѣлое и сердце люботрудное во взысканіе Твое, даруй мнѣ благодать Твою и обнови во мнѣ зраки Твоего образа. Оставихъ Тя, не остави мене; изыди на взысканіе мое, возведи къ пажити Твоей и сопричти мя овцамъ избраннаго Твоего стада, воспитай мя съ ними отъ злака Божественныхъ Твоихъ Таинствъ, молитвами Пречистыя Твоея Матере и всѣхъ святыхъ Твоихъ. Аминь.


Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнѣйшую Херувимъ и Cлавнѣйшую безъ сравненія Серафимъ, безъ истлѣнія Бога Слова рождшую, сущую Богородицу Тя величаемъ. Слава, и нынѣ: Господи, помилуй. (Трижды)
Господи, Іисусе Христе, Сыне Божій, молитвъ ради Пречистыя Твоея Матере, преподобныхъ и богоносныхъ отецъ нашихъ и всѣхъ святыхъ помилуй насъ. Аминь. (3)

–––––––––––––––––––––––
(1) Молитвы, читаемыя передъ канономъ или акаѳистомъ. Въ концѣ вступительныхъ молитвъ, послѣ 50-го псалма можно также прочитать Сvмволъ Вѣры.
(2) Въ канонахъ припѣвъ какъ молитвенное воззваніе произносится передъ первымъ и вторымъ (и третьимъ, когда онъ есть) тропаремъ каждой пѣсни, но не читается передъ тропарями, начинающимися со «Слава Отцу и Сыну и Святому Духу» и «И нынѣ и присно, и во вѣки вѣковъ. Аминь.»
(3) Молитвы, читаемыя по окончаніи каноновъ или акаѳистовъ.



«Вернуться къ оглавленiю Канонъ молебный ко Пресвятѣй Богородицѣ»

Молитвенная помощь
      Просимъ молитвъ нашихъ читателей о здравіи и спасении души іеромонаха Митрофана, іеромонаха Варѳоломея, протоіерея Владиміра, іерея Бориса, iерея Алексѣя, рабовъ Божiихъ Виктора, Максима, Сергия, Галины, Елены, Татианы и всехъ Православныхъ Христианъ.

  Авторъ проекта Викторъ Богучаровъ .

  © 2008–2010, «Бесѣда въ храмѣ» .