Беседа въ храме

О проектѣ
Новости
Афиша
Бесѣда въ храмѣ
Библiотека
Благотворительность
Церковная лавка
Ссылки


Электронная почта




.

Пасхальный канонъ, твореніе святаго Іоанна Дамаскина.


Гласъ 1-й.

Пѣснь 1.
Ирмось: Воскресенія день, просвѣтимся людіе: Пасха, Господня Пасха! Отъ смерти бо къ жизни и отъ земли къ небеси, Христосъ Богъ насъ преведе, побѣдную поющія.
      Припѣвъ: Христосъ воскресе изъ мертвыхъ.
Очистимъ чувствія, и узримъ неприступнымъ свѣтомъ воскресенія Христа блистающася, и радуйтеся, рекуща ясно да услышимъ, побѣдную поюще.
       Христосъ воскресе изъ мертвыхъ.
Небеса убо достойно да веселятся, земля же да радуется, да празднуетъ же міръ, видимый же весь и невидимый: Христосъ бо воста, веселіе вѣчное.

Богородичны.
      Слава Отцу, и Сыну, и Святому Духу.
Умерщвленія предѣлъ сломила еси, вѣчную жизнь рождшая Христа, изъ гроба возсіявшаго днесь, Дѣво Всенепорочная, и мiръ просвѣтившаго.
      И нынѣ и присно и во вѣки вѣковъ, аминь.
Воскресшаго видѣвши Сына Твоего и Бога, радуйся со апостолы Богоблагодатная чистая: и еже радуйся первѣе, яко всѣхъ радости вина, воспріяла еси, Богомати Всенепорочная.

Пѣснь 3.
Ирмось: Пріидите пиво піемъ новое, не отъ камене неплодна чудодѣемое, но нетлѣнія источникъ, изъ гроба одождивша Христа, въ Немже утверждаемся.
       Христосъ воскресе изъ мертвыхъ.
Нынѣ вся исполнишася свѣта, небо же и земля и преисподняя: да празднуетъ убо вся тварь востанiе Христово, въ немже утверждается.
       Христосъ воскресе изъ мертвыхъ.
Вчера спогребохся Тебѣ, Христе, совостаю днесь воскресшу Тебѣ, сраспинахся Тебѣ вчера, Самъ мя спрослави, Спасе, во Царствіи Твоемъ.
      Слава Отцу, и Сыну, и Святому Духу.
На нетлѣнную жизнь прихожду днесь благостію рождшагося изъ Тебе, Чистая, и всѣмъ концемъ свѣтъ облиставшаго.
      И нынѣ и присно и во вѣки вѣковъ, аминь.
Бога, Егоже родила еси плотію, изъ мертвыхъ, якоже рече, воставша видѣвши, Чистая, ликуй, и Сего яко Бога Пречистая возвеличай.

Ѵпакои, гласъ 4-й.
Предварившыя утро яже о Маріи, и обрѣтшыя камень отваленъ отъ гроба, слышаху отъ ангела: во свѣтѣ присносущнѣмъ Сущаго, съ мертвыми что ищете яко человѣка? Видите гробныя пелены. Тецыте и міру проповѣдите, яко воста Господь умертвивый смерть, яко есть Сынъ Бога, спасающаго родъ человѣческій.

Пѣснь 4.
Ирмось: На божественнѣй стражи, богоглаголивый Аввакумъ да станетъ съ нами и покажетъ свѣтоносна ангела, ясно глаголюща: днесь спасеніе міру, яко воскресе Христосъ, яко Всесиленъ.
       Христосъ воскресе изъ мертвыхъ.
Мужескій убо полъ, яко разверзый дѣвственную утробу, явися Христосъ: яко человѣкъ же: агнецъ наречеся, непороченъ же, яко невкусенъ скверны, наша Пасха, и яко Богъ истиненъ, совершенъ речеся.
       Христосъ воскресе изъ мертвыхъ.
Яко единолѣтный агнецъ, благословенный намъ вѣнецъ Христосъ, волею за всѣхъ закланъ бысть, Пасха чистительная, и паки изъ гроба красное правды намъ возсiя солнце.
       Христосъ воскресе изъ мертвыхъ.
Богоотецъ убо Давидъ предъ сѣннымъ ковчегомъ скакаше играя, людіе же Божіи святiи, образовъ сбытiе зряще, веселимся Божественнѣ, яко воскресе Христосъ, яко Всесиленъ.
      Слава Отцу, и Сыну, и Святому Духу.
Создавый Адама, Твоего праотца, Чистая, зиждется отъ Тебе, и смертное жилище разори Своею смертію днесь, и озари вся божественными блистаньми воскресенія.
      И нынѣ и присно и во вѣки вѣковъ, аминь.
Егоже родила еси Христа, прекрасно изъ мертвыхъ возсiявша, Чистая зрящи, добрая и непорочная въ женахъ и красная, днесь во спасеніе всѣхъ, со апостолы радующися, Того прославляй.

Пѣснь 5.
Ирмось: Утренюемъ утреннюю глубоку, и вмѣсто мvра пѣснь принесемъ Владыцѣ, и Христа узримъ правды солнце, всѣмъ жизнь возсiяюща.
       Христосъ воскресе изъ мертвыхъ.
Безмѣрное Твое благоутробiе адовыми узами содержимiи зряще, къ свѣту идяху Христе, веселыми ногами, Пасху хваляще вѣчную.
       Христосъ воскресе изъ мертвыхъ.
Приступимъ свѣщеноснiи исходящу Христу изъ гроба яко Жениху, и спразднуимъ любопразднственными чинми Пасху Божію спасительную.
      Слава Отцу, и Сыну, и Святому Духу.
Просвѣщается божественными лучами и живоносными воскресенія Сына Твоего, Богомати Пречистая, и радости исполняется благочестивыхъ собраніе.
      И нынѣ и присно и во вѣки вѣковъ, аминь.
Не разверзлъ еси врата дѣвства въ воплощеніи, гроба не разрушилъ еси печатей, Царю созданія: отонудуже воскресшаго Тя зрящи Мати, радовашеся.

Пѣснь 6.
Ирмось: Снизшелъ еси въ преисподняя земли и сокрушилъ еси вереи вѣчныя, содержащія связанныя, Христе, и тридневенъ, яко отъ кита Іона, воскреслъ еси отъ гроба.
       Христосъ воскресе изъ мертвыхъ.
Сохранивъ цѣла знаменія, Христе, воскреслъ еси отъ гроба, ключи Дѣвы невредивый въ рождествѣ Твоемъ, и отверзлъ еси намъ райскія двери.
       Христосъ воскресе изъ мертвыхъ.
Спасе мой, живое же и нежертвенное заколеніе, яко Богъ Самъ Себе волею приведъ Отцу, совоскресилъ еси всероднаго Адама, воскресъ отъ гроба.
      Слава Отцу, и Сыну, и Святому Духу.
Возведеся древле держимое смертію и тлѣніемъ, воплотившимся отъ Твоего пречистаго чрева, къ нетлѣннѣй и присносущнѣй жизни, Богородице Дѣво.
      И нынѣ и присно и во вѣки вѣковъ, аминь.
Сниде въ преисподняя земли, въ ложесна Твоя, Чистая, сшедый, и вселивыйся и воплотивыйся паче ума, и воздвиже съ Собою Адама, воскресъ отъ гроба.

Кондакъ, гласъ 8-й.
      Аще и во гробъ снизшелъ еси, Безсмертне, но адову разрушилъ еси силу, и воскреслъ еси яко побѣдитель, Христе Боже, женамъ мѵроносицамъ вѣщавый: радуйтеся, и Твоимъ апостоломъ миръ даруяй, падшимъ подаяй воскресеніе.

Икосъ
      Еже прежде солнца Солнце зашедшее иногда во гробъ, предвариша ко утру, ищущія яко дне мѵроносицы дѣвы, и друга ко друзѣй вопияху: О другини! пріидите, вонями помажемъ Тѣло живоносное и погребенное, плоть Воскресившаго падшаго Адама, лежащую во гробѣ. Идемъ, потщимся якоже волсви, и поклонимся, и принесемъ мѵра яко дары, не въ пеленахъ, но въ плащаницѣ Обвитому, и плачимъ и возопiимъ: О Владыко, востани, падшимъ подаяй воскресеніе.

Таже глаголемъ:
      Воскресеніе Христово видѣвше, поклонимся Святому Господу Іисусу, Единому Безгрѣшному, Кресту Твоему покланяемся, Христе, и святое воскресеніе Твое поемъ и славимъ: Ты бо еси Богъ нашъ, развѣ Тебе иного не знаемъ, имя Твое именуемъ. Пріидите, вси вѣрнiи, поклонимся святому Христову воскресенію: се бо прiиде Крестомъ радость всему міру. Всегда благословяще Господа, поемъ воскресеніе Его: распятіе бо претерпѣвъ, смертію смерть разруши. (Трижды)
      Воскресъ Іисусъ отъ гроба, якоже прорече, даде намъ животъ вѣчный и велiю милость.(Трижды)

Пѣснь 7.
Ирмось: Отроки отъ пещи избавивый, бывъ человѣкъ, страждетъ яко смертенъ, и страстію смертное въ нетлѣнія облачитъ благолѣпіе, Единъ благословенъ отцевъ Богъ и препрославленъ.
       Христосъ воскресе изъ мертвыхъ.
Жены съ мѵры богомудрыя вслѣдъ Тебе течаху: Егоже яко мертва со слезами искаху, поклонишася радующіяся живому Богу, и Пасху тайную Твоимъ, Христе, ученикомъ благовѣстиша.
       Христосъ воскресе изъ мертвыхъ.
Смерти празднуемъ умерщвленіе, адово разрушеніе, иного житія вѣчнаго начало, и играюще поемъ Виновнаго, Единаго Благословеннаго отцевъ Бога, и препрославленнаго.
       Христосъ воскресе изъ мертвыхъ.
Яко воистинну священная, и всепразднственная сія спасительная нощь, и свѣтозарная, свѣтоноснаго дне востанiя сущи провозвѣстница: въ нейже безлѣтный Свѣтъ изъ гроба плотски всѣмъ возсiя.
      Слава Отцу, и Сыну, и Святому Духу.
Умертвивъ Сынъ Твой смерть, Всенепорочная, днесь всѣмъ смертнымъ пребывающій животъ во вѣки вѣковъ дарова, единъ благословенный отцевъ Богъ и препрославленный.
      И нынѣ и присно и во вѣки вѣковъ, аминь.
Всѣмъ царствуяй созданіемъ, бывъ человѣкъ, вселися въ Твою, Богоблагодатная, утробу, и распятіе претерпѣвъ и смерть, воскресе боголѣпно, совозставивъ насъ яко всесиленъ.

Пѣснь 8.
Ирмось: Сей нареченный и святый день, единъ субботъ царь и господь, праздниковъ праздникъ, и торжество есть торжествъ: воньже благословимъ Христа во вѣки.
       Христосъ воскресе изъ мертвыхъ.
Пріидите новаго винограда рожденія, божественнаго веселія, въ нарочитомъ дни воскресенія, Царствія Христова пріобщимся, поюще Его яко Бога во вѣки.
       Христосъ воскресе изъ мертвыхъ.
Возведи окрестъ очи твои, Сіонѣ, и виждь: се бо прiидоша къ тебѣ яко богосвѣтлая свѣтила, отъ запада, и сѣвера, и моря, и востока чада твоя, въ тебѣ благословящія Христа во вѣки.
       Пресвятая Троице, Боже нашъ, слава Тебѣ.
Отче Вседержителю, и Слове, и Душе, треми соединяемое во ипостасѣхъ естество, пресущественне и пребожественне, въ Тя крестихомся и Тя благословимъ во вся вѣки.
      Слава Отцу, и Сыну, и Святому Духу.
Прiиде Тобою въ міръ Господь, Дѣво Богородице, и чрево адово расторгъ, смертнымъ намъ воскресеніе дарова: Тѣмже благословимъ Его во вѣки.
      И нынѣ и присно и во вѣки вѣковъ, аминь.
Всю низложивъ смерти державу Сынъ Твой, Дѣво, Своимъ воскресеніемъ, яко Богъ крѣпкій совознесе насъ и обожи: тѣмже воспѣваемъ Его во вѣки.

Пѣснь 9.
Припѣвъ: Величитъ душа моя воскресшаго тридневно отъ гроба Христа Жизнодавца.
      Ирмосъ:Свѣтися, свѣтися новый Іерусалиме, слава бо Господня на тебѣ возсiя. Ликуй нынѣ и веселися, Сіоне. Ты же, Чистая, красуйся. Богородице, о востанiи Рождества Твоего.
Припѣвъ: Величитъ душа моя волею страдавша, и погребена, и воскресшаго тридневно отъ гроба.
      Свѣтися, свѣтися новый Іерусалиме, слава бо Господня на тебѣ возсiя. Ликуй нынѣ и веселися, Сіоне. Ты же, Чистая, красуйся. Богородице, о востанiи Рождества Твоего.
Припѣвъ: Христосъ Новая Пасха, Жертва Живая, Агнецъ Божiий, вземляй грѣхи мiра.
      О божественнаго, о любезнаго, о сладчайшаго Твоего гласа! Съ нами бо неложно обѣщался еси быти до скончанія вѣка Христе, Егоже вѣрнiи, утвержденіе надежды имуще, радуемся.
Припѣвъ: Ангелъ вопiяше Благодатнѣй: Чистая Дѣво, радуйся, и паки реку: радуйся! Твой Сынъ воскресе тридневенъ отъ гроба, и мертвыя воздвигнувый, людіе, веселитеся.
      О божественнаго, о любезнаго, о сладчайшаго Твоего гласа! Съ нами бо неложно обѣщался еси быти до скончанія вѣка Христе, Егоже вѣрнiи, утвержденіе надежды имуще, радуемся.
Припѣвъ: Возбудилъ еси, уснувъ, мертвыя от вѣка, царски рыкавый яко отъ Iуды левъ.
      О божественнаго, о любезнаго, о сладчайшаго Твоего гласа! Съ нами бо неложно обѣщался еси быти до скончанія вѣка Христе, Егоже вѣрнiи, утвержденіе надежды имуще, радуемся.
Припѣвъ: Магдалина Марiя притече ко гробу, и Христа видѣвши, яко вертоградаря вопрошаше.
      О божественнаго, о любезнаго, о сладчайшаго Твоего гласа! Съ нами бо неложно обѣщался еси быти до скончанія вѣка Христе, Егоже вѣрнiи, утвержденіе надежды имуще, радуемся.
Припѣвъ: Ангелъ облистаяй женамъ вопiяше: престаните отъ слезъ, яко Христосъ воскресе.
      О Пасха велiя и священнѣйшая, Христе! О мудросте, и Слове Божій, и сило! Подавай намъ истѣе Тебе причащатися, въ невечернѣмъ дни Царствія Твоего.
Припѣвъ: Христосъ воскресе, смерть поправый, и мертвыя воздвигнувый, людiе веселитеся.
      О Пасха велiя и священнѣйшая, Христе! О мудросте, и Слове Божій, и сило! Подавай намъ истѣе Тебе причащатися, въ невечернѣмъ дни Царствія Твоего.
Припѣвъ: Днесь владыка плѣни ада, воздвигнувый юзники, яже отъ вѣка имяше лютѣ одержимыя.
      О Пасха велiя и священнѣйшая, Христе! О мудросте, и Слове Божій, и сило! Подавай намъ истѣе Тебе причащатися, въ невечернѣмъ дни Царствія Твоего.
Припѣвъ: Величитъ душа моя Трiипоснаго и Нераздѣльнаго Божества державу.
      Согласно, Дѣво, тебе блажимъ вѣрнiи: радуйся, двере Господня; радуйся, граде одушевленный; радуйся, Еяже пади намъ нынѣ возсiя свѣтъ изъ Тебе рожденнаго из мертвыхъ воскресенiя.
Припѣвъ: Радуйся, Дѣво, радуйся, радуйся, благословенная, препрославленная; Твой бо Сын воскресе тридневенъ отъ гроюа.
      Веселися и радуйся, Божественная двере Свѣта; зашедый бо Iисусъ во гробъ возсiя, просiявъ солнца свѣтлѣе, и вѣрныя вся озаривъ, Богодарованная Владычице.

Ексапостиларiй, самогласенъ:
Плотію уснувъ, яко мертвъ, Царю и Господи, тридневенъ воскреслъ еси, Адама воздвигъ отъ тли, и упразднивъ смерть: Пасха нетлѣнія, міра спасеніе. (Трижды)

Стихиры Пасхи. Гласъ 5-й:
      Да воскреснетъ Богъ, и расточатся врази Его.
      Пасха священная намъ днесь показася: Пасха нова святая, Пасха таинственная, Пасха всечестная, Пасха Христосъ Избавитель, Пасха непорочная, Пасха великая, Пасха вѣрныхъ, Пасха двери райскія намъ отверзающая, Пасха всѣхъ освящающая вѣрныхъ.
      Яко исчезаетъ дымъ, да исчезнутъ.
      Пріидите отъ видѣнія жены благовѣстницы, и Сіону рцыте: пріими отъ насъ радости благовѣщенія воскресенія Христова; красуйся, ликуй и радуйся, Іерусалиме, Царя Христа узрѣвъ изъ гроба яко жениха, происходяща.
      Тако да погибнутъ грмшницы отъ лица Божія, а праведницы да возвеселятся.
      Мѵроносицы жены, утру глубоку, представша гробу Живодавца, обрѣтоша ангела, на камени сѣдяща, и той провѣщавъ имъ сице глаголаше: что ищете Живаго съ мертвыми? Что плачете Нетлѣннаго во тли? Шедше проповѣдите ученикомъ Его.
      Сей день, егоже сотвори Господь, возрадуемся и возвеселимся въ онь.
      Пасха красная, Пасха, Господня Пасха! Пасха всечестная намъ возсiя! Пасха! Радостію другъ друга обымемъ. О Пасха! Избавленіе скорби, ибо изъ гроба днесь яко отъ чертога возсіявъ Христосъ, жены радости исполни глаголя: проповѣдите апостоломъ.
      Слава Отцу, и Сыну, и Святому Духу, и нынѣ и присно и во вѣки вѣковъ. Аминь.

Гласъ тойже:
Воскресенія день, и просвѣтимся торжествомъ, и другъ друга обымемъ. Рцемъ, братiе, и ненавидящимъ насъ, простимъ вся воскресеніемъ, и тако возопiимъ: Христосъ воскресе изъ мертвыхъ, смертію смерть поправъ и сущимъ во гробѣхъ животъ даровавъ.

Таже:
Христосъ воскресе изъ мертвыхъ, смертію смерть поправъ, и сущимъ во гробѣхъ животъ даровавъ. (Трижды)



«Вернуться къ оглавленiю

Молитвенная помощь
      Просимъ молитвъ нашихъ читателей о здравіи и спасении души іеромонаха Митрофана, іеромонаха Варѳоломея, протоіерея Владиміра, іерея Бориса, iерея Алексѣя, рабовъ Божiихъ Виктора, Максима, Сергия, Галины, Елены, Татианы и всѣхъ Православныхъ Христианъ.

  Авторъ проекта Викторъ Богучаровъ .

  © 2008–2010, «Бесѣда въ храмѣ» .