Беседа въ храме

О проектѣ
Новости
Афиша
Бесѣда въ храмѣ
Библiотека
Благотворительность
Церковная лавка
Ссылки


Электронная почта




.

Канонъ молебный ко Пресвятѣй Богородицѣ

поемый во всякой скорби душевнѣй и обстояніи.

Творенiе Феостирикта монаха

Молитвами святыхъ отецъ нашихъ, Господи Іисусе Христе Боже нашъ, помилуй насъ, аминь.
Слава Тебѣ, Боже нашъ, слава Тебѣ.

Царю небесный, Трисвятое, и по Отче нашъ: Господи, помилуй (12 разъ), Слава, и нынѣ: Пріидите, поклонимся: (Трижды), псаломъ 50-й. (1)

Тропарь Богородицѣ, гласъ 4-й.
Къ Богородицѣ прлѣжно нынѣ притецемъ, грѣшніи и смиренніи, и припадемъ въ покаяніи зовуще изъ глубины души: Владычице, помози на ны милосердовавши, потщися, погабаемъ оть множества прегрѣшеній: не отврати Твоя рабы тщы, Тя бо и едину надежду имамы. (Дважды).

Слава, и нынѣ:

Не умолчимъ никогда, Богородице, силы Твоя глаголати недостойніи: аще бо Ты не бы предстояла молящи, кто бы насъ избавилъ отъ толикихъ бѣдъ? кто же бы сохранилъ донынѣ свободны? Не отступимъ, Владычице, оть Тебе: Твоя бо рабы спасаеши присно оть всякихъ лютыхъ.

Псаломъ 50
Помилуй мя, Боже, по велицѣй милости Твоей, и по множеству щедротъ Твоихъ очисти беззаконіе мое. Наипаче омый мя отъ беззаконія моего, и отъ грѣха моего очисти мя; яко беззаконіе мое азъ знаю, и грѣхъ мой предо мною есть выну. Тебѣ Единому согрѣшихъ и лукавое предъ Тобою сотворихъ, яко да оправдишися во словесѣхъ Твоихъ, и побѣдиши внегда судити Ти. Се бо, въ беззаконіяхъ зачатъ есмь, и во грѣсѣхъ роди мя мати моя. Се бо, истину возлюбилъ еси; безвѣстная и тайная премудрости Твоея явилъ ми еси. Окропиши мя vссопомъ, и очищуся; омыеши мя, и паче снѣга убѣлюся. Слуху моему даси радость и веселіе; возрадуются кости смиренныя. Отврати лице Твое отъ грѣхъ моихъ и вся беззаконія моя очисти. Сердце чисто созижди во мнѣ, Боже, и духъ правъ обнови во утробѣ моей. Не отвержи мене отъ лица Твоего и Духа Твоего Святаго не отыми отъ мене. Воздаждь ми радость спасенія Твоего и Духомъ владычнимъ утверди мя. Научу беззаконыя путемъ Твоимъ, и нечестивiи къ Тебѣ обратятся. Избави мя отъ кровей, Боже, Боже спасенія моего; возрадуется языкъ мой правдѣ Твоей. Господи, устнѣ мои отверзеши, и уста моя возвѣстятъ хвалу Твою. Яко аще бы восхотѣлъ еси жертвы, далъ быхъ убо: всесожженія не благоволиши. Жертва Богу духъ сокрушенъ; сердце сокрушенно и смиренно Богъ не уничижитъ. Ублажи, Господи, благоволеніемъ Твоимъ Сіона, и да созиждутся стѣны Іерусалимскія. Тогда благоволиши жертву правды, возношеніе и всесожегаемая; тогда возложатъ на Твой oлтарь тельцы.

Канонъ, гласъ 8-й.
Пѣснь 1.

Ирмось: Воду прошедъ яко сушу, и египетскаго зла избѣжавъ, израильтянинъ вопіяше: Избавителю и Богу нашему поимъ.

Припѣвъ: Пресвятая Богородице, спаси насъ. (2)

Многими содержимь напастьми, къ Тебѣ прибѣгаю, спасенія искій: о Мати Слова и Дѣво! оть тяжкихъ и лютыхъ мя спаси.
      Страстей мя смущаютъ прилози, многаго унынія исполнити мою душу: умири, Отроковице, тишиною Сына и Бога Твоего, Всенепорочная.

Слава Отцу, и Сыну, и Святому Духу.

Спаса рождшую Тя и Бога молю, Дѣво, избавитися ми лютыхъ: къ Тебѣ бо нынѣ прибѣгая, простираю и душу и помышленіе.

И нынѣ и присно и во вѣки вѣковъ, аминь.

Недугующа тѣломъ и душею, посѣщенія Божественнаго, и промышленія оть Тебе сподоби, едина Богомати, яко благая, Благаго же Родительница.

Пѣснь 3.
Ирмось: Небеснаго круга Верхотворче Господи, и Церкве Зиждителю, Ты мене утверди въ любви Твоей, желаній краю, вѣрньіхъ утвержденіе, едине Человѣколюбче.
      Предстательство и покровъ жизни моея полагаю Тя, Богородительнице Дѣво, Ты мя окорми ко пристанищу Твоему, благихъ виновна, вѣрныхъ утвержденіе, едина Всепѣтая.
      Молю, Дѣво, душевное смущеніе, и печали моея бурю разорити: Ты бо, Богоневѣстная, начальника тишины Христа родила еси, едина Пречистая.

Слава: Благодѣтеля рождши, добрыхъ виновнаго, благодѣяній богатство всѣмъ нсточи: вся бо можеши, яко сильнаго въ крѣпости Христа рождши, Богоблаженная.

И нынѣ: Лютыми недуги и болѣзненными страстъми истязаему, Дѣво, Ты ми помози: исцѣленій бо неоскудное Тя знаю сокровище, Пренепорочная, неиждиваемее.

Таже
      Спаси отъ бѣдъ рабы Твоя, Богородице, яко вси по Бозѣ къ Тебѣ прибѣгaемъ, яко нерушимѣй стенѣ и предстaтельству.
      Призри благосердiемъ, всепѣтая Богородице, на мое лютое тѣлесе озлобленiе, и исцели души моея болѣзнь.

Сѣдаленъ, гласъ 2-й.
Моленіе теплое, и стѣна необоримая, милости источниче, мірови прибѣжище, прилѣжно вопіемъ Ти; Богородице Владычице, предвари, и отъ бѣдъ избави насъ, едина вскорѣ предстательствующая.

Пѣснь 4.
Ирмось: Услышахъ, Господи, смотренія Твоего таинство, разумѣхъ дѣла Твоя, прославихъ Твое Божество.
      Страстей моихъ смущеніе, кормчію рождшая Господа, и бурю утиши моихъ прегрѣшеній, Богоневѣстная.
      Милосердія Твоего бездну призывающу подаждь ми, яже благосердаго рождшая, и Спаса всѣхъ поющихъ Тя.
      Наслаждающеся, Пречистая, Твоихъ дарованій, благодарственное воспѣваемъ пѣніе, вѣдуще Тя Богоматерь.

Слава: На одрѣ болѣзни моея и немощи низлежащу ми, яко боголюбива, помози Богородице, едина Приснодѣво.

И нынѣ: Надежду и утвержденіе, и спасенія стѣну недвижиму имуще Тя, Всепѣтая, неудобства всякаго избавляемся.

Пѣснь 5.
Ирмось: Просвѣти нась повелѣніи Твоими, Господи, и мышцею Твоею высокою, Твой миръ подаждь намъ, Человѣколюбче.
      Исполни, Чистая, веселія сердце мое, Твою нетлѣнную дающи радость, веселія рождшая виновнаго.
      Избави нась отъ бѣдъ, Богородице Чистая, вѣчное рождши избавленіе, и миръ всякъ умъ преимущій.

Слава: Разрѣши мглу прегрѣшеній моихъ, Богоневѣсто, просвѣщеніемъ Твоея свѣтлости, Свѣтъ рождшая Божественный и превѣчный.

И нынѣ: Исцѣли, Чистая, души моея неможеніе, посѣщенія Твоего сподобльшая, и здравіе молитвами Твоими подаждь ми.

Пѣснь 6.
Ирмось: Молитву пролію ко Господу и Тому возвѣщу печали моя, яко золъ душа моя исполнися, и животь мой аду приближися, и молюся яко Іона: оть тли, Боже, возведи мя.
      Смерти и тли яко спаслъ есть, Самъ Ся издавъ смерти, тлѣніемъ и смертію мое естество ято бывшее, Дѣво, моли Господа и Сына Твоего, враговъ злодѣйствія мя избавити.
      Предстательницу Тя живота вѣмъ, и хранительницу тверду, Дѣво, и напастей рѣшащу молвы, и налоги бѣсовъ отгоняющу: и молюся всегда отъ тли страстей моихъ избавити мя.

Слава: Яко стѣну прибѣжища стяжахомъ, и душъ всесовершенное спасеніе, и пространство въ скорбехъ, Отроковице, и просвѣщеніемъ Твоимъ присно радуемся, о Владычице! и нынѣ насъ оть страстей и бѣдъ спаси.

И нынѣ: На одрѣ нынѣ немоществуяй лежу, и нѣсть исцѣленія плоти моей, но Бога и Спаса міру, и Избавителя недуговъ рождшая, Тебѣ молюся Благой: оть тли недугь возстави мя.

Кондакъ, гласъ 6-й.
      Предстательетво христіанъ непостыдное, ходатайство ко Творцу непреложное, не презри грѣшныхъ моленій гласы, но предвари яко Благая на помощь насъ, вѣрно зовущихъ Ти: ускори на молитву, и потшися на, умоленіе, предстательствующи присно, Богородице, чтущихъ Тя.

Другiй кондакъ, гласъ той же.
      Не имамы иныя помощи, не имамы иныя надѣжды, развѣ Тебе, Пречистая Дѣво, Ты намъ помози, на Тебе надѣемся, и Тобою хвалимся, Твои есмы рабы, да не постыдимся.

Сѣдаленъ, гласъ той же.
      Не ввѣри мя человѣческому предстательству, Пресвятая Владычице, но пріими моленіе раба Твоего: скорбь бо обдержитъ мя, терпѣти не могу демонскаго стрѣлянія, покрова не имамъ, ниже гдѣ прибѣгну окаянный, всегда побѣждаемь, и утѣшенія не имамъ, развѣ Тебе, Владычице міра, упованіе и предстательство вѣрныхъ, не презри моленіе мое, полезно сотвори.

Пѣснь 7.
Ирмось: От Іудеи дошедше отроцы, вь Вавилонѣ иногда вѣрою Троическою пламень пещный попраша, поюще: отцевь Боже, благословенъ еси.
      Наше спасеніе якоже восхотѣлъ еси, Спасе, устроити, во утробу Дѣвыя вселился еси, Юже міру предстательницу показалъ еси: отецъ нашихъ Боже, благословенъ еси.
      Волителя милости, Егоже родила еси, Мати чистая, умоли избавитися отъ прегрѣшеній, и душевныхъ скверн, вѣрою зовущимъ: отецъ нашихъ Боже, благословенъ еси.

Слава: Сокровище спасенія, и источникъ нетлѣнія, Тя рождшую, и столпъ утвержденія, и дверь покаянія, зовущымъ показалъ еси: отецъ нашихъ Боже, благословенъ еси.

И нынѣ: Тѣлесныя слабости, и душевныя недуги, Богородительнице, любовію приступающихъ ко крову Твоему, Дѣво, исцѣлити сподоби, Спаса Христа намъ рождшая.

Пѣснь 8.
Ирмось: Царя Небеснаго, Егоже поють вои Ангельстіи, хвалите и превозносите во вся вѣки.
      Помощи, яже оть Тебе, требующыя не презри, Дѣво, поющыя и превозносящыя Тя во вѣки.
      Неможеніе души моея исцѣляеши, и тѣлесныя болѣзни, Дѣво: да Тя прославлю, Чистая, во вѣки.

Слава: Исцѣленій богатство изливаеши, вѣрно поющымъ Тя, Дѣво, и превозносящымъ неизреченное Твое рождество.

И нынѣ: Напастей Ты прилоги отгоняеши, и страстей находы, Дѣво: тѣмже Тя поемъ во вся вѣки.

Пѣснь 9.
Ирмось: Воистинну Богородицу Тя исповѣдуемъ, спасенніи Тобою, Дѣво Чистая, сь безплотными лики Тя величающе.
      Тока слезъ моихъ не отвратися, Яже отъ всякаго лица всяку слезу отъемшаго, Дѣво, Христа рождшая.
      Радости мое сердце исполни, Дѣво, Яже радости пріемшая исполненіе, грѣховную печаль потребляющи.
      Пристанище и предстательство къ Тебѣ прибѣгающихъ буди, Дѣво, и стѣна нерушимая, прибѣжище же и покровъ и веселіе.

Слава: Свѣта Твоего зарями просвѣти, Дѣво, мракъ невѣденія отгоняющи, благовѣрно Богородицу Тя исповѣдующихъ.

И нынѣ: На мѣстѣ озлобленія немощи смирившагося, Дѣво, исцели, изъ нездравія во здравіе претворяющи.

Молитва.
      Царице моя преблагая, надеждо моя Богородице, пріятелище сирыхъ, и странныхъ предстательнице, скорбящихъ радосте, обидимыхъ покровительнице, зриши мою бъду, зриши мою скорбь: по мози ми яко немощну, окорми мя яко странна: обиду мою вѣси, разрѣши ту, яко волиши: яко не имамъ иныя помощи развѣ Тебе, ни иныя предстательницы, ни благія утѣшительницы, токмо Тебе, о Богомати, яко да сохраниши мя и покрыеши, во вѣки вѣковъ, аминь.

Молитва иная.
      Къ кому возопію, Владычице? Къ кому прибѣгну въ горести моей, aще не къ Тебѣ, Царице Небесная? Кто плачъ мой и воздыханiе мое прiиметъ, aще не Ты, Пренепорочная, надеждо христiанъ и прибѣжище намъ, грѣшным? Кто паче Тебе въ напастѣхъ защититъ? Услыши убо стенанiе мое, и приклони ухо Твое ко мнѣ, Владычице Мaти Бога моего, и не презри мене, требующаго Твоея помощи, и не отрини мене, грѣшнаго. Вразуми и научи мя, Царице Небесная; не отступи от мене, раба Твоего, Владычице, за роптанiе мое, но буди мнѣ Мaти и заступница. Вручaю себе милостивому покрову Твоему: приведи мя, грѣшнаго, къ тихой и безмятежнѣй жизни, да плaчуся о грѣсѣхъ моихъ. Къ кому бо прибѣгну повинный азъ, aще не къ Тебѣ, упованiю и прибѣжищу грѣшныхъ, надеждою на неизреченную милость Твою и щедроты Твоя окриляемь? О, Владычице Царице Небесная! Ты мнѣ упованiе и прибѣжище, покровъ и заступленiе и помощь. Царице моя преблагая и скорая заступнице! Покрый Твоимъ ходатайствомъ моя прегрѣшенiя, защити мене отъ врагъ видимыхъ и невидимыхъ; умягчи сердца злыхъ человѣкъ, возстающихъ на мя. О, Мaти Господа моего Творцa! Ты еси корень дѣвства и неувядаемый цвѣтъ чистоты. О, Богородительнице! Ты подaждь ми помощь немощствующему плотскими страстьми и болѣзнующему сердцемъ, едино бо Твое и съ Тобою Твоего Сына и Бога нашего имам заступленiе; и Твоимъ пречуднымъ заступленiемъ да избaвлюся отъ всякiя бѣды и напасти, о Пренепорочная и Преславная Божiя Мaти Марiе. Темже со упованiемъ глаголю и вопiю: радуйся, благодатная, радуйся, обрадованная; радуйся, преблагословенная, Господь с] Тобою.


Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнѣйшую Херувимъ и Cлавнѣйшую безъ сравненія Серафимъ, безъ истлѣнія Бога Слова рождшую, сущую Богородицу Тя величаемъ. Слава, и нынѣ: Господи, помилуй. (Трижды)
Господи, Іисусе Христе, Сыне Божій, молитвъ ради Пречистыя Твоея Матере, преподобныхъ и богоносныхъ отецъ нашихъ и всѣхъ святыхъ помилуй насъ. Аминь. (3)

–––––––––––––––––––––––
(1) Молитвы, читаемыя передъ канономъ или акаѳистомъ. Въ концѣ вступительныхъ молитвъ, послѣ 50-го псалма можно также прочитать Сvмволъ Вѣры.
(2) Въ канонахъ припѣвъ какъ молитвенное воззваніе произносится передъ первымъ и вторымъ (и третьимъ, когда онъ есть) тропаремъ каждой пѣсни, но не читается передъ тропарями, начинающимися со «Слава Отцу и Сыну и Святому Духу» и «И нынѣ и присно, и во вѣки вѣковъ. Аминь.»
(3) Молитвы, читаемыя по окончаніи каноновъ или акаѳистовъ.



«Вернуться къ оглавленiю Канонъ Ангелу Хранителю.»

Молитвенная помощь
      Просимъ молитвъ нашихъ читателей о здравіи и спасении души іеромонаха Митрофана, іеромонаха Варѳоломея, протоіерея Владиміра, іерея Бориса, iерея Алексѣя, рабовъ Божiихъ Виктора, Максима, Сергия, Галины, Елены, Татианы и всѣхъ Православныхъ Христианъ.

  Авторъ проекта Викторъ Богучаровъ .

  © 2008–2010, «Бесѣда въ храмѣ» .