Беседа въ храме

О проектѣ
Новости
Афиша
Бесѣда въ храмѣ
Библiотека
Благотворительность
Церковная лавка
Ссылки


Электронная почта




.

Благодарственныя молитвы по Святомъ Причащеніи.


Слава Тебѣ, Боже. Слава Тебѣ, Боже. Слава Тебѣ, Боже.


Таже благодарственныя сія молитвы глаголи:
Благодарю Тя, Господи Боже мой, яко не отринулъ мя еси грѣшнаго, но общника мя быти святынь Твоихъ сподобилъ еси. Благодарю Тя, яко мене недостойнаго причаститися пречистыхъ Твоихъ и небесныхъ даровъ сподобилъ еси. Но, Владыко Человѣколюбче, насъ ради умерый же и воскресый, и даровавый намъ страшная сія и животворящая Таинства, во благодѣяніе и освященіе душъ и тѣлесъ нашихъ: даждь быти симъ и мнѣ во исцѣленіе души же и тѣла, во отгнаніе всякаго сопротивнаго, въ просвѣщеніе очію сердца моего, въ миръ душевныхъ моихъ силъ, въ вѣру непостыдну, въ любовь нелицемѣрну, во исполненіе премудрости, въ соблюденіе заповѣдей Твоихъ, въ приложеніе Божественныя Твоея благодати, и Твоего Царствія присвоеніе: да во святыни Твоей тѣми сохраняемь, Твою благодать поминаю всегда, и не ктому себѣ живу, но Тебѣ нашему Владыцѣ и благодѣтелю: и тако сего житія изшедъ о надеждѣ живота вѣчнаго, въ присносущный достигну покой, идѣже празднующихъ гласъ непрестанный, и безконечная сладость, зрящихъ Твоего лица доброту неизреченную. Ты бо еси истинное желаніе, и неизреченное веселіе любящихъ Тя, Христе Боже нашъ, и Тя поеть вся тварь во вѣки.

Великаго Василія, 2-я:
Владыко Христе Боже, Царю вѣковъ, и Содѣтелю всѣхъ, благодарю Тя о всѣхъ, яже ми еси подалъ благихъ, и о причащеніи пречистыхъ и животворящихъ Твоихъ Таинствъ. Молю убо Тя, Блаже и Человѣколюбче: сохрани мя подъ кровомъ Твоимъ, и въ сѣни крилу Твоею: и даруй ми чистою совѣстію, — даже до послѣдняго моего издыханія, достойно причащатися святынь Твоихъ, во оставленіе грѣховъ, и въ жизнь вѣчную, Ты бо еси хлѣбъ животный, источникъ святыни, Податель благихъ: и Тебѣ славу возсылаемъ, со Отцемъ и Святымъ Духомъ, нынѣ, и присно, и во вѣки вѣковъ. Аминь.

Симеона Метафраста, 3-я:
Давый пищу мнѣ плоть Твою волею, огнь сый и опаляяй недостойныя, да не опалиши мене, Содѣтелю мой: наче же пройди во уды моя, во вся составы, во утробу, въ сердце. Попали терніе всѣхъ моихъ прегрѣшеній. Душу очисти, освяти помышленія. Составы утверди сь костьми вкупѣ. Чувствъ просвѣти простую пятерицу. Всего мя спригвозди страху Твоему. Присно покрый, соблюди же, и сохрани мя отъ всякаго дѣла и слова душетлѣннаго. Очисти и омый, и украси мя: удобри, вразуми, и просвѣти мя. Покажи мя Твое селеніе единаго Духа, и не ктому селеніе грѣха. Да яко Твоего дому, входомъ причащенія, яко огня мене бѣжитъ всякъ злодѣй, всяка страсть. Молитвенники Тебѣ приношу вся святыя, чиноначалія же безплотныхъ, Предтечу Твоего, премудрыя Апостолы, къ симъ же Твою нескверную чистую Матерь, ихже мольбы Благоутробне пріими, Христе мой, и сыномъ свѣта содѣлай Твоего служителя. Ты бо еси освященіе и единый нашихъ, Блаже, душъ и свѣтлость: и Тебѣ лѣпоподобно, яко Богу и Владыцѣ, славу вси возсылаемъ на всякъ день.

Молитва иная, 4-я:
Тѣло Твое Святое, Господи Іисусе Христе, Боже нашъ, да будеть ми въ животъ вѣчный, и Кровь Твоя честная во оставленіе грѣховъ: буди же ми благодареніе сіе въ радость, здравіе и веселіе: въ страшное же второе пришествіе Твое, сподоби мя грѣшнаго стати одесную славы Твоея, молитвами Пречистыя Твоея Матере, и всѣхъ святыхъ.

Молитва иная, ко Пресвятѣй Богородицѣ, 5-я:
Пресвятая Владычице Богородице, свѣте помраченныя моея души, надеждо, покрове, прибѣжище, утѣшеніе, радованіе мое, благодарю Тя, яко сподобила мя еси недостойнаго, причастника быти пречистаго Тѣла и честныя Крове Сына Твоего. Но рождшая истинный Свѣтъ, просвѣти моя умныя очи сердца: Яже источникъ безсмертія рождшая, оживотвори мя умерщвленнаго грѣхомъ: Яже милостиваго Бога любоблагоутробная Мати, помилуй мя, и даждь ми умиленіе, и сокрушеніе въ сердцѣ моемъ, и смиреніе въ мыслехъ моихъ, и воззваніе въ плѣненіихъ помышленій моихъ: и сподоби мя, до послѣдняго издыханія, неосужденно пріимати пречистыхъ Таинъ освященіе, во исцѣленіе души же и тѣла. И подаждь ми слезы покаянія и исповѣданія, во еже пѣти и славити Тя во вся дни живота моего, яко благословенна и препрославленна еси во вѣки. Аминь.

Таже:
Нынѣ отпущаеши раба Твоего, Владыко, по глаголу Твоему, съ миромъ; яко видѣста очи мои спасеніе Твое, еже еси уготовалъ предъ лицемъ всѣхъ людей, свѣтъ во откровеніе языковъ, и славу людей Твоихъ, Израиля.

Трисвятое:
Святый Боже, Святый Крѣпкій, Святый Безсмертный, помилуй насъ. (Читается трижды, съ крестнымъ знаменіемъ и пояснымъ поклономъ.)

Слава Отцу и Сыну и Святому Духу, и нынѣ и присно и во вѣки вѣковъ. Аминь.

Молитва ко Пресвятой Троицѣ:
Пресвятая Троице, помилуй насъ; Господи, очисти грѣхи наша; Владыко, прости беззаконія наша; Святый, посѣти и исцѣли немощи наша, имене Твоего ради. Господи, помилуй. (Трижды). Слава, и нынѣ.

Молитва Господня:
Отче нашъ, Иже еси на небесѣхъ! Да святится имя Твое, да пріидетъ Царствіе Твое, да будетъ воля Твоя, яко на небеси и на земли. Хлѣбъ нашъ насущный даждь намъ днесь; и остави намъ долги наша, якоже и мы оставляемъ должникомъ нашимъ; и не введи насъ во искушеніе, но избави насъ отъ лукаваго.

Тропарь Святому Іоанну Златоустому, глась 8-й:
Усть твоихъ якоже свѣтлость огня, возсіявши благодать, вселенную просвѣти: не сребролюбія мірови сокровища сниска, высоту намъ смиренномудрія показа, но твоими словесы наказуя, отче Іоанне Златоусте, моли Слова Христа Бога спастися душамъ нашымъ.

Кондакъ, гласъ 6-й:
Слава: Отъ небесь пріялъ еси божественную благодать, и твоими устнами вся учиши покланятися въ Троицѣ единому Богу, Іоанне Златоусте всеблаженне, преподобне, достойно хвалимъ тя: еси бо на ставникъ, яко божественная являя.
И нынѣ: Предстательство христіанъ непостыдное, ходатайство ко Творцу непреложное, не презри грѣшныхъ моленій гласы, но предвари, яко Благая, на помощь нась, вѣрно зовущихъ Ти: ускори на молитву, и потщися на умоленіе, предстательствующи присно, Богородице, чтущихъ Тя.

Аще же будеть святаго Василія литургія, чти святому Василію тропарь,. гласъ 1-й:
Во всю землю изыде вѣщаніе твое, яко пріемшую слово твое, имже боголѣпно научилъ еси, естество сущихъ уяснилъ еси, человѣческія обычаи украсилъ еси, царское священіе, отче преподобне, моли Христа Бога, спастися душамъ нашимъ.

Кондакъ, гласъ 4-й:
Слава: Явился еси основаніе непоколебимое церкве, подая всѣмъ некрадомое господство человѣкомъ, запечатляя твоими велѣньми, небоявленне Василіе преподобне.
И нынѣ: Предстательство христіанъ непостыдное, ходатайство ко Творцу непреложное, не презри грѣшныхъ моленій гласы, но предвари, яко Благая, на помощь нась, вѣрно зовущихъ Ти: ускори на молитву, и потщися на умоленіе, предстательствующи присно, Богородице, чтущихъ Тя.

Аще же будетъ литургія Преждеосвященныхъ, чти святому Григорію тропарь, гласъ 4-й:
Иже отъ Бога свыще божественную благодать воспріемъ, славне Григоріе, и Того силою укрѣпляемь, евангельски шествовати изволилъ еси, отонудуже у Христа возмездіе трудовъ пріялъ еси всеблаженне: Егоже моли, да спасетъ души наша.

Кондакъ, гласъ 3-й:
Слава: Подобоначальникъ показался еси Начальника пастыремъ Христа, иноковъ чреды, отче Григоріе, ко оградѣ небеснѣй наставляя, и оттуду научилъ еси стадо Христово заповѣдемъ Его; нынѣ же съ ними радуешися, и ликуеши въ небесныхъ кровѣхъ.
И нынѣ: Предстательство христіанъ непостыдное, ходатайство ко Творцу непреложное, не презри грѣшныхъ моленій гласы, но предвари, яко Благая, на помощь нась, вѣрно зовущихъ Ти: ускори на молитву, и потщися на умоленіе, предстательствующи присно, Богородице, чтущихъ Тя.
Господи, помилуй. (12 разъ). Слава, и нынѣ.
Честнѣйшую Херувимъ и Cлавнѣйшую безъ сравненія Серафимъ, безъ истлѣнія Бога Слова рождшую, сущую Богородицу Тя величаемъ.

По причащеніи же да хранить себе кійждо кь трезвеніи и воздержаніи, и немногоглаголаніи: дабы въ той день честно соблюлъ въ себѣ Христа пріятаго.



«Вернуться къ оглавленiю Пасхальный канонъ»

Молитвенная помощь
      Просимъ молитвъ нашихъ читателей о здравіи и спасении души іеромонаха Митрофана, іеромонаха Варѳоломея, протоіерея Владиміра, іерея Бориса, iерея Алексѣя, рабовъ Божiихъ Виктора, Максима, Сергия, Галины, Елены, Татианы и всехъ Православныхъ Христианъ.

  Авторъ проекта Викторъ Богучаровъ .

  © 2008–2010, «Бесѣда въ храмѣ» .