Беседа въ храме

О проектѣ
Новости
Афиша
Бесѣда въ храмѣ
Библiотека
Благотворительность
Церковная лавка
Ссылки


Электронная почта




.

Акаѳистъ святителю Христову Николаю, архіепископу Миръ Ликійскихъ, чудотворцу.


Кондакъ 1.
Возбранный Чудотворче и изрядный угодниче Христовъ, міру всему источаяй многоцѣнное милости мѵро и неисчерпаемое чудесъ море, восхваляю тя любовію, Святителю Николае; ты же, яко имѣяй дерзновеніе ко Господу, отъ всякихъ мя бѣдъ свободи, да зову ти: Радуйся, Николае, великій Чудотворче.

Икосъ 1.
Ангела образомъ, земнаго суща естествомъ яви тебе всея твари Создатель; благоплодную бо доброту души твоея провидѣвъ, преблаженне Николае, научи всѣхъ вопити тебѣ сице:
      Радуйся, отъ утробы матернiя очищенный;
      радуйся, даже до конца освященный.
      Радуйся, рожденіемъ своимъ родителей удививый;
      радуйся, силу душевную абiе по рождествѣ явивый.
      Радуйся, саде земли обѣтованія;
      радуйся, цвѣте Божественнаго сажденiя.
      Радуйся, лозо добродѣтельная винограда Христова;
      радуйся, древо чудоточное рая Іисусова.
      Радуйся, крине райскаго прозябенiя;
      радуйся, мѵро Христова благоуханія.
      Радуйся, яко тобою отгонится рыданіе;
      радуйся, яко тобою приносится радованіе.
      Радуйся, Николае, великій Чудотворче.

Кондакъ 2.
Видяще твоихъ мѵръ изліяніе, богомудре, просвѣщаемся душами и тѣлесы, дивнаго тя мѵроточца живоносна, Николае, разумѣюще: чудесы бо яко водами, благодатію Божіею изливающимися, напаяеши вѣрно вопіющихъ къ Богу: Аллилуіа.

Икосъ 2.
Разумъ неуразумѣнный вразумляя о Святѣй Троицѣ, былъ еси въ Никеи со святыми отцы поборникъ исповѣданія православныя вѣры: равна бо Отцу Сына исповѣдалъ еси, соприсносущна и сопрестольна, Арiа же безумнаго обличилъ еси. Сего ради вѣрнiи научишася воспѣвати тебѣ:
      Радуйся, великій благочестія столпе;
      радуйся, вѣрныхъ прибѣжища граде.
      Радуйся, твердое Православія укрѣпленіе;
      радуйся, честное Пресвятыя Троицы носило и похваленiе.
      Радуйся, Отцу равночестна Сына проповѣдавый;
      радуйся, Арiа возбѣсившагося отъ Собора святыхъ отгнавый.
      Радуйся, отче, отцевъ славная красото;
      радуйся, всѣхъ богомудрыхъ премудрая доброто.
      Радуйся, огненная словеса испущаяй;
      радуйся, добрѣ стадо свое наставляяй.
      Радуйся, яко тобою вѣра утверждается;
      радуйся, яко тобою ересь низлагается.
      Радуйся, Николае, великій Чудотворче.

Кондакъ 3.
Силою, данною ти свыше, слезу всяку отъялъ еси отъ лица лютѣ страждущихъ, богоносе отче Николае: алчущимъ бо явился еси кормитель, въ пучинѣ морстѣй сущимъ изрядный правитель, недугующимъ исцѣленіе и всѣмъ всякъ помощникъ показался еси, вопіющимъ Богу: Аллилуіа.

Икосъ 3.
Имеяше воистинну, отче Николае, съ Небесе пѣснь тебѣ воспѣваема быти, а не отъ земли: како бо кто отъ человѣкъ возможетъ твоея святыни величія проповѣдати? Но мы, любовію твоею побѣждаеми, вопіемъ ти сице:
      Радуйся, образе агнцевъ и пастырей;
      радуйся, святое очистилище нравовъ.
      Радуйся, добродѣтелей великихъ вмѣстилище;
      радуйся, святыни чистое и честное жилище.
      Радуйся, свѣтильниче всесвѣтлый и вселюбимый;
      радуйся, свѣте златозарный и непорочный.
      Радуйся, достойный Ангеловъ собесѣдниче;
      радуйся, добрый человѣковъ наставниче.
      Радуйся, правило вѣры благочестивыя;
      радуйся, образе кротости духовныя.
      Радуйся, яко тобою отъ страстей тѣлесныхъ избавляемся;
      радуйся, яко тобою сладостей духовныхъ исполняемся.
      Радуйся, Николае, великій Чудотворче.

Кондакъ 4.
Буря недоумѣнія смущаетъ ми умъ, како достойно есть пѣти чудеса твоя, блаженне Николае; никтоже бо можетъ я исчести, аще бы и многи языки имѣлъ и глаголати восхотѣлъ; но мы дивно Богу, въ тебѣ прославляющемуся, дерзаемъ воспѣвати: Аллилуіа.

Икосъ 4.
Слышаша, богомудре Николае, ближнiи и дальнiи величіе чудесъ твоихъ, яко по воздуху легкими благодатными крилами навыклъ еси сущихъ въ бѣдахъ предваряти, скоро отъ тѣхъ избавляя всѣхъ, вопіющихъ къ тебѣ таковая:
      Радуйся, избавленіе отъ печали;
      радуйся, подаяніе благодати.
      Радуйся, нечаемыхъ золъ прогонителю;
      радуйся, желаемыхъ благихъ насадителю.
      Радуйся, скорый утѣшителю въ бѣдѣ сущихъ;
      радуйся, страшный наказателю обидящихъ.
      Радуйся, чудесъ пучино, Богомъ излiянная;
      радуйся, закона Христова скрижали, Богописанныя.
      Радуйся, крѣпкое падающихъ возведеніе;
      радуйся, правое стоящихъ утвержденіе.
      Радуйся, яко тобою всякая лесть обнажается;
      радуйся, яко тобою всякая истина сбывается.
      Радуйся, Николае, великій Чудотворче.

Кондакъ 5.
Боготечная звѣзда явился еси, наставляя по морю плавающихъ лютѣ, имже смерть предстояще вскорѣ иногда, аще не бы ты предсталъ еси призывающимъ тя въ помощь, Чудотворче святый Николае; уже бо нестыдно бѣсомъ летающимъ и погрузити корабли хотящимъ запретивъ, отгналъ еси ихъ, вѣрныя же научилъ еси спасающему тобою Богу взывати: Аллилуiа.

Икосъ 5.
Видѣша отроковицы, на бракъ скверный нищеты ради уготованныя, великое твое къ нищимъ милосердіе, преблаженне отче Николае, егда старцу родителю ихъ нощію узельцы три злата таяся подалъ еси, самаго со дщерьми избавляя отъ паденія грѣховнаго. Того ради слышиши отъ всѣхъ сице:
      Радуйся, милости превеликія сокровище;
      радуйся, промышленія о людехъ прiятелище.
      Радуйся, пище и отрадо къ тебѣ прибѣгающихъ;
      радуйся, хлѣбе неснѣдаемый алчущихъ.
      Радуйся, богатство, бѣднѣ живущимъ на земли Богомъ данное;
      радуйся, воздвиженіе скорое убогихъ.
      Радуйся, быстрое нищихъ услышанiе;
      радуйся, скорбящихъ пріятное попеченіе.
      Радуйся, трiехъ дѣвъ непорочный невѣстителю;
      радуйся, чистоты усердный хранителю.
      Радуйся, ненадежныхъ надѣянiе;
      радуйся, всего міра наслажденіе.
      Радуйся, Николае, великій Чудотворче.

Кондакъ 6.
Проповѣдуетъ мiръ весь тебе, преблаженне Николае, скораго въ бѣдахъ заступника, яко многажды во единомъ часѣ по земли путешествующимъ и по морю плавающимъ, предваряя, пособствуеши, купно всѣхъ отъ злыхъ сохраняя, вопіющихъ къ Богу: Аллилуіа.

Икосъ 6.
Возсіялъ еси свѣтъ животный, избавленіе нося воеводамъ, неправедную смерть прiяти имущимъ, тебе, добрый пастырю Николае, призывающимъ, егда вскорѣ явлься во снѣ цареви, устрашилъ еси его, сихъ же неврежденныхъ отпустити повелѣлъ еси. Сего ради съ ними купно и мы благодарственно вопіемъ ти:
      Радуйся, усердно призывающимъ тя помогаяй;
      радуйся, отъ неправеднаго убіенія избавляяй.
      Радуйся, отъ лестныя сохраняяй клеветы;
      радуйся, неправедныя разрушаяй совѣты.
      Радуйся, растерзаяй лжу яко паучину;
      радуйся, возношаяй славно истину.
      Радуйся, неповинныхъ отъ узъ разрѣшеніе;
      радуйся, и мертвецевъ оживленіе.
      Радуйся, проявителю правды;
      радуйся, помрачителю неправды.
      Радуйся, яко тобою неповиннии избавлены отъ меча;
      радуйся, яко тобою насладишася свѣта.
      Радуйся, Николае, великій Чудотворче.

Кондакъ 7.
Хотя богохульное еретическое отгнати злосмрадiе, мѵро воистинну благовонное, таинственное явился еси, Николае; люди мvрейскiя упаслъ еси и весь міръ своимъ благодатнымъ мѵромъ исполнилъ еси. И отъ насъ убо богомерзкое грѣховное злосмрадiе отжени, да благопріятно Богу вопіемъ: Аллилуіа.

Икосъ 7.
Новаго тя Ноя, наставника ковчега спасительнаго разумѣемъ, отче святый Николае, бурю всѣхъ лютыхъ разгоняющаго направленіемъ своимъ, тишину же Божественную приносящаго вопіющимъ таковая:
      Радуйся, обуреваемыхъ тихое пристанище;
      радуйся, утопающихъ извѣстное хранилище.
      Радуйся, плавающихъ посредѣ пучинъ добрый кормчій;
      радуйся, треволненія морская уставляющій.
      Радуйся, превожденiе сущихъ въ вихрѣхъ;
      радуйся, согрѣянiе сущихъ во мразѣхъ.
      Радуйся, сіяніе, скорбный мракъ разгоняющее;
      радуйся, свѣтило, вся концы земли просвѣщающее.
      Радуйся, отъ бездны грѣховныя человѣки избавляяй;
      радуйся, въ бездну адскую сатану ввергаяй.
      Радуйся, яко тобою дерзновенно бездну милосердія Божія призываемъ;
      радуйся, яко тобою отъ потопа гнѣва избавльшеся, миръ съ Богомъ обрѣтаемъ.
      Радуйся, Николае, великій Чудотворче.

Кондакъ 8.
Странное чудо является притекающимъ къ тебѣ, блаженне Николае, священная твоя церковь: въ ней бо и малое моленіе приносяще, велiихъ недуговъ пріемлемъ исцѣленіе, аще токмо по Бозе упованіе на тя возложимъ, вѣрно вопіюще: Аллилуіа.

Икосъ 8.
Весь еси всѣмъ воистинну помощникъ, богоносе Николае, и собралъ еси вкупѣ вся прибѣгающія къ тебѣ, яко свободителъ, питатель и врачъ скорый всѣмъ земнымъ, на похвалу всѣхъ подвизая вопити къ тебѣ сице:
      Радуйся, всякихъ исцѣленій источниче;
      радуйся, лютѣ страждущимъ помощниче.
      Радуйся, заре, сіяющая въ нощи грѣховной блуждающимъ;
      радуйся, росо неботочная въ знои трудовъ сущимъ.
      Радуйся, подаваяй требующимъ благостроенiе;
      радуйся, уготовляяй просящимъ изобиліе.
      Радуйся, многажды прошеніе предваряяй;
      радуйся, старымъ сѣдинамъ силу обновляяй.
      Радуйся, многихъ заблуждшихъ отъ пути истиннаго обличителю;
      радуйся, тайнъ Божіихъ вѣрный служителю.
      Радуйся, яко тобою зависть попираемъ;
      радуйся, яко тобою благонравное житіе исправляемъ.
      Радуйся, Николае, великій Чудотворче.

Кондакъ 9.
Всякія утоли болѣзни, великій нашъ заступниче Николае, растворяя благодатная врачеванія, услаждающая души наша, сердца же веселящая всѣхъ усердно къ помощи твоей притекающихъ, Богу же вопіющихъ: Аллилуіа.

Икось 9.
Вѣтія суемудренныя нечестивыхъ видимъ тобою посрамленныя, богомудре отче Николае: Арiа бо хульника, раздѣляюща Божество, и Савеллiа, смѣшающа Святую Троицу, препрѣлъ, насъ же во Православіи укрѣпилъ еси. Сего ради вопіемъ ти сице:
      Радуйся, щите, защищаяй благочестіе;
      радуйся, мечу, посѣцаяй злочестiе.
      Радуйся, учителю Божественныхъ велѣнiй;
      радуйся, губителю богопротивныхъ ученій.
      Радуйся, лѣствице, Богомъ утвержденная, еюже восходимъ къ небеси;
      радуйся, покрове, Богомъ зданный, имже покрываются мнози.
      Радуйся, немудрыхъ умудривый твоими словесы;
      радуйся, лѣнивыхъ подвигнувый твоими нравы.
      Радуйся, свѣтлосте заповѣдей Божіихъ неугасимая;
      радуйся, луче оправданій Господнихъ пресвѣтлая.
      Радуйся, яко ученіемъ твоимъ сокрушаются еретическія главы;
      радуйся, яко тобою вѣрнiи сподобляются славы.
      Радуйся, Николае, великій Чудотворче.

Кондакъ 10.
Спасти хотя душу, плоть твою духови покорилъ еси воистинну, отче нашъ Николае: молчаньми бо прежде и бореньми съ помыслы, дѣянію богомыслiе приложилъ еси, богомыслiемъ же разумъ совершенъ стяжалъ еси, имже дерзновенно съ Богомъ и Ангелы бесѣдовалъ еси, всегда вопiющи: Аллилуіа.

Икосъ 10.
Стѣна еси похваляющимъ, преблаженне, чудеса твоя и всѣмъ къ заступленію твоему прибѣгающимъ; тѣмже и насъ, въ добродѣтели убогихъ, отъ нищеты, напасти, недуговъ и нуждъ различныхъ свобождай, вопіющихъ ти съ любовію таковая:
      Радуйся, отъ убожества вѣчнаго изымаяй;
      радуйся, богатство нетлѣнное подаваяй.
      Радуйся, брашно негиблющее алчущимъ правды;
      радуйся, питіе неисчерпаемое жаждущимъ жизни.
      Радуйся, отъ мятежа и брани соблюдаяй;
      радуйся, отъ узъ и плѣненія свобождаяй.
      Радуйся, преславный въ бѣдахъ заступниче;
      радуйся, превеликій въ напастехъ защитниче.
      Радуйся, многихъ отъ погибели исхитивый;
      радуйся, безчисленныхъ неврежденно сохранивый.
      Радуйся, яко тобою лютыя смерти грѣшнiи избѣгаютъ;
      радуйся, яко тобою Жизнь Вѣчную кающiися получаютъ.
      Радуйся, Николае, великій Чудотворче.

Кондакъ 11.
Пѣніе Пресвятѣй Троицѣ паче иныхъ принеслъ еси, преблаженне Николае, умомъ, словомъ и дѣломъ: многимъ бо испытаніемъ правовѣрная повелѣнія уяснилъ еси вѣрою, надеждою и любовію наставляя насъ въ Троицѣ Единому Богу воспѣвати: Аллилуіа.

Икось 11.
Свѣтозарную лучу во мраце житія сущимъ неугасимую видимъ тя, Богомъ избраніе отче Николае: съ невещественными бо ангельскими свѣты беседуеши о несозданномъ Троическомъ свѣтѣ, вѣрныхъ же души просвѣщавши, вопіющихъ ти таковая:
      Радуйся, озареніе Трисолнечнаго свѣта;
      радуйся, деннице незаходимаго солнца.
      Радуйся, свѣще, Божественнымъ пламенемъ возжженная;
      радуйся, яко угасилъ еси бѣсовскій пламень нечестія.
      Радуйся, свѣтлое правовѣрія проповѣданіе;
      радуйся, доброзрачное свѣта евангельскаго сіяніе.
      Радуйся, молнiе, ереси пожигающая;
      радуйся, громе, устрашающій соблазняющія.
      Радуйся, истиннаго научителю разума;
      радуйся, таинственнаго изъявителю ума.
      Радуйся, яко тобою попрася поклоненіе твари;
      радуйся, яко тобою научихомся поклонятися Творцу въ Троицѣ.
      Радуйся, Николае, великій Чудотворче.

Кондакъ 12.
Благодать, данную ти отъ Бога, свѣдущiи, радующеся твою память празднуемъ по долгу, преславный отче Николае, и къ чудному заступленію твоему вседушно притекаемъ; преславныхъ же твоихъ дѣяній, яко песка морскаго и множества звѣзднаго исчести не могуще, недоумѣніемъ объяти бывше, вопіемъ къ Богу: Аллилуіа.

Икосъ 12.
Поюще твоя чудеса, восхваляемъ тя, всехвальне Николае: въ тебѣ бо Богъ, въ Троицѣ прославляемый, дивно прославися. Но аще и попремногу составленныя отъ души псалмы и пѣсни приносимъ ти, Чудотворче святый, ничтоже творимъ равно дарованію чудесъ твоихъ, имже удивляющеся, вопіемъ къ тебѣ таковая:
      Радуйся, Царя царствующихъ и Господа господствующихъ служителю;
      радуйся, служителей Его небесныхъ сожителю.
      Радуйся, людемъ вѣрнымъ поможенiе;
      радуйся, рода христіанскаго возвышеніе.
      Радуйся, побѣды тезоименитый;
      радуйся, вѣнценосче нарочитый.
      Радуйся, всѣхъ добродѣтелей зерцало;
      радуйся, всѣхъ притекающихъ къ тебѣ крѣпкое забрало.
      Радуйся, по Бозѣ и Богородицѣ все наше упованіе;
      радуйся, тѣлесъ нашихъ здравіе и душъ спасеніе.
      Радуйся, яко тобою отъ вѣчныя смерти свобождаемся;
      радуйся, яко тобою безконечныя жизни сподобляемся.
      Радуйся, Николае, великій Чудотворче.

Кондакъ 13.
О пресвятый и пречудный отче Николае, утѣшеніе всѣхъ скорбящихъ, нынѣшнее наше пріими приношеніе и отъ геенны избавитися намъ Господа умоли богопріятнымъ твоимъ ходатайствомъ, да съ тобою воспѣваемъ: Аллилуіа.

Сей кондакъ глаголи трижды.

И паки икосъ 1.
Ангела образомъ, земнаго суща естествомъ яви тебе всея твари Создатель; благоплодную бо доброту души твоея провидѣвъ, преблаженне Николае, научи всѣхъ вопити тебѣ сице:
      Радуйся, отъ утробы матернiя очищенный;
      радуйся, даже до конца освященный.
      Радуйся, рожденіемъ своимъ родителей удививый;
      радуйся, силу душевную абiе по рождествѣ явивый.
      Радуйся, саде земли обѣтованія;
      радуйся, цвѣте Божественнаго сажденiя.
      Радуйся, лозо добродѣтельная винограда Христова;
      радуйся, древо чудоточное рая Іисусова.
      Радуйся, крине райскаго прозябенiя;
      радуйся, мѵро Христова благоуханія.
      Радуйся, яко тобою отгонится рыданіе;
      радуйся, яко тобою приносится радованіе.
      Радуйся, Николае, великій Чудотворче.

Кондакъ 1.
Возбранный Чудотворче и изрядный угодниче Христовъ, міру всему источаяй многоцѣнное милости мѵро и неисчерпаемое чудесъ море, восхваляю тя любовію, Святителю Николае; ты же, яко имѣяй дерзновеніе ко Господу, отъ всякихъ мя бѣдъ свободи, да зову ти: Радуйся, Николае, великій Чудотворче.

Молитва святителю Христову и чудотворцу Николаю архіепископу Миръ Ликійскихъ:
О всесвятый Николае, угодниче преизрядный Господень, теплый нашъ заступниче, и вездѣ въ скорбехъ скорый помощниче! Помози ми, грѣшному и унылому, въ настоящемъ семъ житіи, умоли Господа Бога даровати ми оставленіе всѣхъ моихъ грѣховъ, елико согѣршихъ отъ юности моея, во всемъ житіи моемъ, дѣломъ, словомъ, помышленіемъ и всѣми моими чувствы; и во исходѣ души моея помози ми, окаянному, умоли Господа Бога, всея твари Содѣтеля, избавити мя воздушныхъ мытарствъ и вѣчнаго мученія, да всегда прославляю Отца и Сына и Святаго Духа и твое милостивное предстательство, нынѣ и присно и во вѣки вѣковъ. Аминь.

Молитва иная:
О, всеблагій отче Николае, пастырю и учителю всѣхъ вѣрою притекающихъ къ твоему заступленію и теплою молитвою тебѣ призывающихъ! Скоро потщися и избави Христово стадо отъ волковъ, губящихъ е; и всякую страну христіанскую огради и сохрани святыми твоими молитвами, отъ мiрскаго мятежа, труса, нашествія иноплеменниковъ и междоусобныя брани, отъ глада, потопа, огня и напрасныя смерти; и якоже помиловалъ еси трiехъ мужей въ темницѣ сѣдящихъ и избавилъ еси ихъ царева гнѣва и посѣченiя мечнаго, тако помилуй и мене, умомъ, словомъ и дѣломъ во тьмѣ грѣховъ суща, избави мя гнѣва Божія и вѣчныя казни. Яко да твоимъ ходатайствомъ и помощію, своимъ же милосердіемъ и благодатію Христосъ Богъ тихое и безгрѣшное житіе дастъ ми пожити въ вѣцѣ семъ и избавитъ мя шуiяго стоянія, сподовитъ же деснаго со всѣми святыми. Аминь.



«Вернуться къ оглавленiю Послѣдованіе ко Св. Причащенію»

Молитвенная помощь
      Просимъ молитвъ нашихъ читателей о здравіи и спасенiи души іеромонаха Митрофана, іеромонаха Варѳоломея, протоіерея Владиміра, іерея Бориса, iерея Алексѣя, рабовъ Божiихъ Виктора, Максима, Сергiя, Галины, Елены, Татiаны и всѣхъ Православныхъ Христiанъ.

  Авторъ проекта Викторъ Богучаровъ .

  © 2008–2010, «Бесѣда въ храмѣ» .