Беседа въ храме

О проектѣ
Новости
Афиша
Бесѣда въ храмѣ
Библiотека
Благотворительность
Церковная лавка
Ссылки


Электронная почта




.

Молитвы утреннія


Воставъ отъ сна, прежде всякаго другого дѣла, стань благоговѣйно, представляя себя предъ Всевидящимъ Богомъ, и, совершая крестное знаменіе, произнеси: (1)

Во имя Отца, и Сына, и Святаго Духа, Аминь.

Затѣмъ немного подожди, пока всѣ чувства твои не придутъ въ тишину и мысли твои не оставятъ все земное, и тогда произноси слѣдующія молитвы, безъ поспѣшности и со вниманіемъ сердечнымъ:

Молитва мытаря
(Евангеліе отъ Луки, глава 18, стихъ 13)

Боже, милостивъ буди мнѣ грѣшному. (Поклонъ)

Молитва предначинательная
Господи Іисусе Христе, Сыне Божій, молитвъ ради Пречистыя Твоея Матере и всѣхъ святыхъ, помилуй насъ. Аминь.(2)
Слава Тебѣ, Боже нашъ, слава Тебѣ.

Молитва Святому Духу
Царю Небесный, Утѣшителю, Душе истины, Иже вездѣ сый и вся исполняяй, Сокровище благихъ и жизни Подателю, пріиди и вселися въ ны, и очисти ны отъ всякія скверны, и спаси, Блаже, души наша.(3)

Трисвятое
Святый Боже, Святый Крѣпкій, Святый Безсмертный, помилуй насъ. (Читается трижды, съ крестнымъ знаменіемъ и пояснымъ поклономъ.)

Слава Отцу и Сыну и Святому Духу, и нынѣ и присно и во вѣки вѣковъ. Аминь.

Молитва ко Пресвятой Троицѣ
Пресвятая Троице, помилуй насъ; Господи, очисти грѣхи наша; Владыко, прости беззаконія наша; Святый, посѣти и исцѣли немощи наша, имене Твоего ради. Господи, помилуй. (Трижды). Слава, и нынѣ.(4)

Молитва Господня
Отче нашъ, Иже еси на небесѣхъ! Да святится имя Твое, да пріидетъ Царствіе Твое, да будетъ воля Твоя, яко на небеси и на земли. Хлѣбъ нашъ насущный даждь намъ днесь; и остави намъ долги наша, якоже и мы оставляемъ должникомъ нашимъ; и не введи насъ во искушеніе, но избави насъ отъ лукаваго.

Тропари Троичные
Воставше отъ сна, припадаемъ Ти, Блаже, и ангельскую пѣснь вопіемъ Ти, Сильне: Святъ, Святъ, Святъ еси, Боже, Богородицею помилуй насъ.
Слава: Отъ одра и сна воздвиглъ мя еси, Господи, умъ мой просвѣти и сердце, и устне мои отверзи, во еже пети Тя, Святая Троице: Святъ, Святъ, Святъ еси, Боже, Богородицею помилуй насъ.
И нынѣ: Внезапно Судія пріидетъ, и коегождо дѣянія обнажатся, но страхомъ зовемъ (5) въ полунощи: Святъ, Святъ, Святъ еси, Боже, Богородицею помилуй насъ. Господи, помилуй. (12 разъ)

Молитва ко Пресвятой Троицѣ
Отъ сна воставъ, благодарю Тя, Святая Троице, яко многія ради Твоея благости и долготерпѣнія не прогнѣвался еси на мя, лѣниваго и грѣшнаго, ниже погубилъ мя еси со беззаконьми моими; но человеколюбствовалъ еси обычно и въ нечаянии лежащаго воздвиглъ мя еси, во еже утреневати и славословити державу Твою. И нынѣ просвѣти мои очи мысленныя, отверзи моя уста поучатися словесемъ Твоимъ, и разумѣти заповѣди Твоя, и творити волю Твою, и пети Тя во исповѣданіи сердечнѣмъ, и воспѣвати всесвятое имя Твое, Отца и Сына и Святаго Духа, нынѣ и присно и во вѣки вѣковъ. Аминь.

Пріидите, поклонимся Цареви нашему Богу. (Поклонъ)
Пріидите, поклонимся и припадемъ Христу, Цареви нашему Богу. (Поклонъ)
Пріидите, поклонимся и припадемъ Самому Христу, Цареви и Богу нашему. (Поклонъ)

Псаломъ 50
Помилуй мя, Боже, по велицѣй милости Твоей, и по множеству щедротъ Твоихъ очисти беззаконіе мое. Наипаче омый мя отъ беззаконія моего, и отъ грѣха моего очисти мя; яко беззаконіе мое азъ знаю, и грѣхъ мой предо мною есть выну. Тебѣ Единому согрѣшихъ и лукавое предъ Тобою сотворихъ, яко да оправдишися во словесѣхъ Твоихъ, и побѣдиши внегда судити Ти. Се бо, въ беззаконіяхъ зачатъ есмь, и во грѣсѣхъ роди мя мати моя. Се бо, истину возлюбилъ еси; безвѣстная и тайная премудрости Твоея явилъ ми еси. Окропиши мя vссопомъ, и очищуся; омыеши мя, и паче снѣга убѣлюся. Слуху моему даси радость и веселіе; возрадуются кости смиренныя. Отврати лице Твое отъ грѣхъ моихъ и вся беззаконія моя очисти. Сердце чисто созижди во мнѣ, Боже, и духъ правъ обнови во утробѣ моей. Не отвержи мене отъ лица Твоего и Духа Твоего Святаго не отыми отъ мене. Воздаждь ми радость спасенія Твоего и Духомъ владычнимъ утверди мя. Научу беззаконыя путемъ Твоимъ, и нечестивiи къ Тебѣ обратятся. Избави мя отъ кровей, Боже, Боже спасенія моего; возрадуется языкъ мой правдѣ Твоей. Господи, устнѣ мои отверзеши, и уста моя возвѣстятъ хвалу Твою. Яко аще бы восхотѣлъ еси жертвы, далъ быхъ убо: всесожженія не благоволиши. Жертва Богу духъ сокрушенъ; сердце сокрушенно и смиренно Богъ не уничижитъ. Ублажи, Господи, благоволеніемъ Твоимъ Сіона, и да созиждутся стѣны Іерусалимскія. Тогда благоволиши жертву правды, возношеніе и всесожегаемая; тогда возложатъ на Твой oлтарь тельцы.

Сvмволъ вѣры
Вѣрую во единаго Бога Отца, Вседержителя, Творца небу и земли, видимымъ же всѣмъ и невидимымъ.
И во единаго Господа Іисуса Христа, Сына Божія, Единороднаго, Иже отъ Отца рожденнаго прежде всѣхъ вѣкъ; Свѣта отъ Свѣта, Бога истинна отъ Бога истинна, рожденна, несотворенна, единосущна Отцу, Имже вся быша.
Насъ ради человѣкъ и нашего ради спасенія сшедшаго съ небесъ и воплотившагося отъ Духа Свята и Маріи Дѣвы и вочеловечшася.
Распятаго же за ны при Понтийстѣмъ Пилатѣ, и страдавша, и погребенна.
И воскресшаго въ третій день по Писаніемъ.
И возшедшаго на небеса, и сѣдяща одесную Отца.
И паки грядущаго со славою судити живымъ и мертвымъ, Егоже Царствію не будетъ конца.
И въ Духа Святаго, Господа, Животворящаго, Иже отъ Отца исходящаго, Иже со Отцемъ и Сыномъ спокланяема и сславима, глаголавшаго пророки.
Во едину Святую, Соборную и Апостольскую Церковь.
Исповѣдую едино крещеніе во оставленіе грѣховъ.
Чаю воскресенія мертвыхъ, и жизни будущаго вѣка. Аминь.

Молитва первая, святаго Макарія Великаго
Боже, очисти мя грѣшнаго, яко николиже сотворихъ благое предъ Тобою; но избави мя отъ лукаваго, и да будетъ во мнѣ воля Твоя, да неосужденно отверзу уста моя недостойная и восхвалю имя Твое святое, Отца и Сына и Святаго Духа, нынѣ и присно и во вѣки вѣковъ Аминь.

Молитва вторая, того же святаго
Отъ сна воставъ, полунощную пѣснь приношу Ти, Спасе, и припадая вопію Ти: не даждь ми уснути во грѣховнѣй смерти, но ущедри мя, распныйся волею, и лежащаго мя въ лѣности ускоривъ возстави, и спаси мя въ предстояніи и молитвѣ, и по снѣ нощнѣмъ возсіяй ми день безгрѣшенъ, Христе Боже, и спаси мя.

Молитва третья, того же святаго
Къ Тебѣ, Владыко Человѣколюбче, отъ сна воставъ прибѣгаю, и на дѣла Твоя подвизаюся милосердіемъ Твоимъ, и молюся Тебѣ: помози ми на всякое время, во всякой вещи, и избави мя отъ всякія мірскія злыя вещи и діавольскаго поспѣшенія, и спаси мя, и введи въ Царство Твое вѣчное. Ты бо еси мой Сотворитель и всякому благу Промысленникъ и Податель, о Тебѣ же все упованіе мое, и Тебѣ славу возсылаю, нынѣ и присно и во вѣки вѣковъ. Аминь.

Молитва четвертая, того же святаго
Господи, Иже многою Твоею благостію и великими щедротами Твоими далъ еси мнѣ, рабу Твоему, мимошедшее время нощи сея безъ напасти прейти отъ всякаго зла противна; Ты Самъ, Владыко, всяческихъ Творче, сподоби мя истиннымъ Твоимъ свѣтомъ и просвѣщеннымъ сердцемъ творити волю Твою, нынѣ и присно и во вѣки вѣковъ. Аминь.

Молитва пятая, святаго Василія Великаго
Господи Вседержителю, Боже силъ и всякія плоти, въ вышнихъ живый и на смиренныя призираяй, сердца же и утробы испытуяй и сокровенная человѣковъ явѣ предвѣдый, Безначальный и Присносущный Свѣте, у Него же нѣсть премѣненiя, или преложенія осѣненіе; Самъ, Безсмертный Царю, пріими моленія наша, яже въ настоящее время, на множество Твоихъ щедротъ дерзающе, отъ скверныхъ къ Тебѣ устенъ творимъ, и остави намъ прегрѣшенія наша, яже дѣломъ, и словомъ, и мыслію, вѣдѣніемъ, или невѣдѣніемъ согрѣшенная нами; и очисти ны отъ всякія скверны плоти и духа. И даруй намъ бодреннымъ сердцемъ и трезвенною мыслію всю настоящаго житія нощь прейти, ожидающимъ пришествія свѣтлаго и явленнаго дне Единороднаго Твоего Сына, Господа и Бога и Спаса нашего Іисуса Христа, въ оньже со славою Судія всѣхъ пріидетъ, комуждо отдати по дѣломъ его; да не падше и облѣнившеся, но бодрствующе и воздвижени въ дѣланіе обрящемся готови, въ радость и Божественный чертогъ славы Его совнидемъ, идѣже празднующихъ гласъ непрестанный, и неизреченная сладость зрящихъ Твоего лица доброту неизреченную. Ты бо еси истинный Свѣтъ, просвѣщаяй и освящаяй всяческая, и Тя поетъ вся тварь во вѣки вѣковъ. Аминь.

Молитва шестая, того же святаго
Тя благословимъ, вышній Боже и Господи милости, творящаго присно съ нами великая же и неизслѣдованная, славная же и ужасная, ихъ же нѣсть числа, подавшаго намъ сонъ во упокоеніе немощи нашея, и ослабленіе трудовъ многотрудныя плоти. Благодаримъ Тя, якo не погубилъ еси насъ со беззаконьми нашими, но человѣколюбствовалъ еси обычно, и въ нечаянiи лежащія ны воздвиглъ еси, во еже славословити державу Твою. Тѣмже молимъ безмѣрную Твою благость, просвѣти наша мысли, очеса, и умъ нашъ отъ тяжкаго сна лѣности возстави: отверзи наша уста, и исполни я Твоего хваленія, яко да возможемъ непоколеблемо пѣти же и исповѣдатися Тебѣ, во всѣхъ, и отъ всѣхъ славимому Богу, Безначальному Отцу, со Единороднымъ Твоимъ Сыномъ, и Всесвятымъ и Благимъ и Животворящимъ Твоимъ Духомъ, нынѣ и присно и во вѣки вѣковъ. Аминь.

Молитва седьмая, ко Пресвятой Богородицѣ
Воспѣваю благодать Твою, Владычице, молю Тя, умъ мой облагодати. Ступати право мя настави, путемъ Христовыхъ заповѣдей. Бдети къ пѣсни укрѣпи, унынія сонъ отгоняющи. Связана пленицами грѣхопадений, мольбами Твоими разрѣши, Богоневѣсто. Въ нощи мя и во дни сохраняй, борющихъ врагъ избавляющи мя. Жизнодателя Бога рождшая, умерщвлена мя страстьми оживи. Яже Свѣтъ невечернiй рождшая, душу мою ослѣпшую просвѣти. О дивная Владычня палато, домъ Духа Божественна мене сотвори. Врача рождшая, уврачуй души моея многолѣтныя страсти. Волнующася житейскою бурею, ко стези мя покаянія направи. Избави мя огня вечнующаго, и червiя же злаго, и тартара. Да мя не явиши бѣсомъ радованіе, иже многимъ грѣхомъ повинника. Нова сотвори мя, обетшавшаго нечувственными, Пренепорочная, согрѣшеніи. Странна муки всякія покажи мя, и всѣхъ Владыку умоли. Небесная ми улучити веселія, со всѣми святыми, сподоби. Пресвятая Дѣво, услыши гласъ непотребнаго раба Твоего. Струю давай мнѣ слезамъ, Пречистая, души моея скверну очищающи. Стенанія отъ сердца приношу Ти непрестанно, усердствуй, Владычице. Молебную службу мою пріими, и Богу благоутробному принеси. Превышшая Ангелъ, мiрскаго мя превышша слитія сотвори. Свѣтоносная Сѣене небесная, духовную благодать во мнѣ направи. Руцѣ воздѣю и устнѣ къ похвалению, осквернены скверною, Всенепорочная. Душетлѣнныхъ мя пакостей избави, Христа прилѣжно умоляющи; Емуже честь и поклоненіе подобаетъ, нынѣ и присно и во вѣки вѣковъ. Аминь.

Молитва восьмая, ко Господу нашему Іисусу Христу
Многомилостиве и Всемилостиве Боже мой, Господи Іисусе Христе, многія ради любве сшелъ и воплотился еси, яко да спасеши всѣхъ. И паки, Спасѣ, спаси мя по благодати, молю Тя; аще бо отъ дѣлъ спасеши мя, нѣсть се благодать, и даръ, но долгъ паче. Ей, многій въ щедротахъ и неизреченный въ милости! Вѣруяй бо въ Мя, реклъ еси, о Христе мой, живъ будетъ и не узритъ смерти во вѣки. Аще убо вѣра, яже въ Тя, спасаетъ отчаянныя, се вѣрую, спаси мя, яко Богъ мой еси Ты и Создатель. Вѣра же вмѣсто дѣлъ да вмѣнится мнѣ, Боже мой, не обрящеши бо дѣлъ отнюдъ оправдающихъ мя. Но та вѣра моя да довлѣетъ вмѣсто всѣхъ, та да отвѣщаетъ, та да оправдитъ мя, та да покажетъ мя причастника славы Твоея вѣчныя. Да не убо похититъ мя сатана, и похвалится, Слове, еже отторгнути мя отъ Твоея руки и ограды; но или хощу, спаси мя, или не хощу, Христе Спасе мой, предвари скоро, скоро погибохъ: Ты бо еси Богъ мой отъ чрева матере моея. Сподоби мя, Господи, нынѣ возлюбити Тя, якоже возлюбихъ иногда той самый грѣхъ; и паки поработати Тебѣ безъ лѣности тощно, якоже поработахъ прежде сатанѣ льстивому. Наипаче же поработаю Тебѣ, Господу и Богу моему Іисусу Христу, во вся дни живота моего, нынѣ и присно и во вѣки вѣковъ. Аминь.

Молитва девятая, къ Ангелу хранителю
Святый Ангеле, предстояй окаянной моей души и страстной моей жизни, не остави мене грѣшнаго, ниже отступи отъ мене за невоздержаніе мое. Не даждь мѣста лукавому демону обладати мною, насильствомъ смертнаго сего тѣлесе; укрѣпи бѣдствующую и худую мою руку и настави мя на путь спасенія. Ей, святый Ангеле Божій, хранителю и покровителю окаянныя моея души и тѣла, вся мнѣ прости, еликими тя оскорбихъ во вся дни живота моего, и аще что согрешихъ въ прешедшую нощь сію, покрый мя въ настоящій день, и сохрани мя отъ всякаго искушенія противнаго, да ни въ коемъ грѣсѣ прогнѣваю Бога, и молися за мя ко Господу, да утвердитъ мя въ страсѣ Своемъ, и достойна покажетъ мя раба Своея благости. Аминь.

Молитва десятая, ко Пресвятѣй Богородицѣ
Пресвятая Владычице моя Богородице, святыми Твоими и всесильными мольбами отжени отъ мене, смиреннаго и окаяннаго раба Твоего, уныніе, забвеніе, неразуміе, нерадѣніе, и вся скверная, лукавая и хульная помышленія отъ окаяннаго моего сердца и отъ помраченнаго ума моего; и погаси пламень страстей моихъ, яко нищъ есмь и окаяненъ. И избави мя отъ многихъ и лютыхъ воспоминаній и предпріятій, и отъ всѣхъ дѣйствъ злыхъ свободи мя. Яко благословенна еси отъ всѣхъ родовъ, и славится пречестное имя Твое во вѣки вѣковъ. Аминь.

Молитвенное призываніе святаго, егоже имя носиши
Моли Бога о мнѣ, святый угодниче Божій (имя), яко азъ усердно къ тебѣ прибѣгаю, скорому помощнику и молитвеннику о душѣ моей.

Молитвенное призываніе святой, еяже имя носиши
Моли Бога о мнѣ, святая угоднице Божія (имя), яко азъ усердно къ тебѣ прибѣгаю, скорой помощницѣ и молитвенницѣ о душѣ моей.

Пѣснь Пресвятой Богородице
Богородице Дѣво, радуйся, Благодатная Марiе, Господь съ Тобою; благословена Ты въ женахъ и благословенъ плодъ чрева Твоего, яко Спаса родила еси душъ нашихъ.

Тропарь Кресту и молитва за Отечество
Спаси, Господи, люди Твоя, и благослови достояніе Твое, побѣды на сопротивныя даруя, и Твое сохраняя Крестомъ Твоимъ жительство.

Молитва о живыхъ
Спаси, Господи, и помилуй отца моего духовнаго (имя), родителей моихъ (имена), сродниковъ (имена), начальниковъ, наставниковъ, благодѣтелей (имена ихъ) и всѣхъ православныхъ христіанъ.

Молитва о усопшихъ
Упокой, Господи, души усопшихъ рабъ Твоихъ: родителей моихъ, сродниковъ, благодѣтелей (имена ихъ), и всѣхъ православныхъ христіанъ, и прости имъ вся согрѣшенія вольная и невольная, и даруй имъ Царствіе Небесное.

Если можешь, читай вмѣсто краткихъ молитвъ о живыхъ и усопшихъ этотъ помянникъ:

О живыхъ
Помяни, Господи Іисусе Христе, Боже нашъ, милости и щедроты Твоя отъ вѣка сущія, ихже ради и вочеловѣчился еси, и распятіе и смерть, спасенія ради право въ Тя вѣрующихъ, претерпѣти изволилъ еси; и воскресъ изъ мертвыхъ, вознеслся еси на небеса и сѣдиши одесную Бога Отца, и призираеши на смиренныя мольбы всѣмъ сердцемъ призывающихъ Тя: приклони ухо Твое, и услыши смиренное моленіе мене, непотребнаго раба Твоего, въ воню благоуханія духовнаго, Тебѣ за вся люди Твоя приносящаго. И въ первыхъ помяни Церковь Твою Святую, Соборную и Апостольскую, юже снабдѣлъ еси честною Твоею Кровію, и утверди, и укрѣпи, и разшири, умножи, умири, и непреобориму адовыми враты во вѣки сохрани; раздиранія Церквей утиши, шатанія языческая угаси, и ересей востанiя скоро разори и искорени, и въ ничтоже силою Святаго Твоего Духа обрати. (Поклонъ)

Спаси, Господи, и помилуй Богомъ хранимую страну нашу, власти и воинство ея, да тихое и безмолвное житіе поживемъ во всякомъ благочестіи и чистотѣ. (Поклонъ)

Спаси, Господи, и помилуй Великаго Господина и Отца нашего Святѣйшаго Патріарха Алексія, преосвященныя митрополиты, архіепископы и епископы православныя, іереи же и діаконы, и весь причетъ церковный, яже поставилъ еси пасти словесное Твое стадо, и молитвами ихъ помилуй и спаси мя грѣшнаго. (Поклонъ)

Спаси, Господи, и помилуй отца моего духовнаго (имя рекъ), и святыми его молитвами прости моя согрѣшенія. (Поклонъ)

Спаси, Господи, и помилуй родители моя (имена ихъ), братію и сестры, и сродники моя по плоти, и вся ближнія рода моего, и други, и даруй имъ мирная Твоя и премірная благая. (Поклонъ)

Спаси, Господи, и помилуй старцы и юныя, нищія и сироты и вдовицы, и сущiя въ болѣзни и въ печалехъ, бѣдахъ же и скорбехъ, обстоянiихъ и плѣненiихъ, темницахъ же и заточенiихъ, изряднѣе же въ гоненiихъ, Тебе ради и вѣры православныя, отъ языкъ безбожныхъ, отъ отступникъ и отъ еретиковъ, сущiя рабы Твоя, и помяни я, посѣти, укрѣпи, утѣши, и вскорѣ силою Твоею ослабу, свободу и избаву имъ подаждь. (Поклонъ)

Спаси, Господи, и помилуй посланныя въ службу, путешествующія, отцы и братію нашу, и вся православныя христiаны. (Поклонъ)

Спаси, Господи, и помилуй ихже азъ безуміемъ моимъ соблазнихъ, и отъ пути спасительнаго отвратихъ, къ дѣломъ злымъ и неподобнымъ приведохъ; Божественнымъ Твоимъ Промысломъ къ пути спасенія паки возврати. (Поклонъ)

Спаси, Господи, и помилуй ненавидящія и обидящія мя, и творящія ми напасти, и не остави ихъ погибнути мене ради, грѣшнаго. (Поклонъ)

Отступившiя отъ православныя вѣры и погибельными ересьми ослѣпленныя, свѣтомъ Твоего познанія просвѣти и Святѣй Твоей Апостольстѣй Соборнѣй Церкви причти. (Поклонъ)

О усопшихъ
Помяни, Господи, отъ житія сего отшедшія святѣйшія патріархи, преосвященныя митрополиты, архіепископы и епископы православныя, во иерейстѣмъ же и въ причтѣ церковнѣмъ, и монашестѣмъ чинѣ Тебѣ послужившія, и въ вѣчныхъ Твоихъ селенiихъ со святыми упокой. (Поклонъ.)

Помяни, Господи, души усопшихъ рабовъ Твоихъ, родителей моихъ (имена ихъ), и всѣхъ сродниковъ по плоти; и прости ихъ вся согрѣшенія вольная и невольная, даруя имъ Царствіе и причастіе вѣчныхъ Твоихъ благихъ и Твоея безконечныя и блаженныя жизни наслажденіе. (Поклонъ)

Помяни, Господи, и вся въ надежди воскресенія и жизни вѣчныя усопшія, отцы и братію нашу, и сестры, и здѣ лежащія и повсюду, православныя христiаны, и со святыми Твоими, идѣже присѣщаетъ свѣтъ лица Твоего, всели, и насъ помилуй, яко Благъ и Человѣколюбецъ. Аминь. (Поклонъ)

Подаждь, Господи, оставленіе грѣховъ всѣмъ прежде отшедшимъ въ вѣрѣ и надежди воскресенія, отцемъ, братіямъ и сестрамъ нашимъ и сотвори имъ вѣчную память. (Трижды)

Окончаніе молитвъ
Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнѣйшую Херувимъ и Cлавнѣйшую безъ сравненія Серафимъ, безъ истлѣнія Бога Слова рождшую, сущую Богородицу Тя величаемъ.(6)
Слава, и нынѣ: Господи, помилуй. (Трижды)
Господи, Іисусе Христе, Сыне Божій, молитвъ ради Пречистыя Твоея Матере, преподобныхъ и богоносныхъ отецъ нашихъ и всѣхъ святыхъ помилуй насъ. Аминь.

–––––––––––––––––––––––

Примѣчанія
(1) Напечатанное курсивомъ (поясненія и названія молитвъ) не читается во время молитвы.
(2) Вмѣсто этой молитвы можно читать слѣдующую:
«Молитвами Святыхъ Отецъ нашихъ, Господи Іисусѣ Христѣ Боже нашъ, помилуй насъ, аминь.»
(3) Отъ Пасхи до Вознесенія вмѣсто этой молитвы читается тропарь: "Христосъ воскресе изъ мертвыхъ, смертію смерть поправъ, и сущимъ во гробехъ животъ даровавъ". (Трижды) Отъ Вознесенія до Троицы начинаемъ молитвы со "Святый Боже...", опуская все предшествующія.
Это замѣчаніе относится и къ молитвамъ на сонъ грядущимъ.
(4) Когда написано «Слава», «И нынѣ», надо читать полностью: «Слава Отцу и Сыну и Святому Духу», «И нынѣ и присно и во вѣки вѣковъ. Аминь»
(5) Въ церковнославянскомъ языкѣ нѣтъ звука ё, а поэтому надо читать "зовемъ", а не "зовёмъ", "твое", а не "твоё", "мое", а не "моё" и т.д.
(6) Отъ Пасхи до Вознесенія вмѣсто этой молитвы читается припѣвъ и ирмосъ 9-й пѣсни пасхальнаго канона:
«Ангелъ вопияше Благодатнѣй: Чистая Дево, радуйся! И паки реку: радуйся! Твой Сынъ воскресе тридневенъ отъ гроба и мертвыя воздвигнувый; людіе, веселитеся!
Свѣтися, свѣтися, новый Іерусалимѣ, слава бо Господня на тебѣ возсия. Ликуй нынѣ и веселися, Сіонѣ. Ты же, Чистая, красуйся, Богородице, о востании Рождества Твоего».
Это замѣчаніе относится и къ вечернимъ молитвамъ.



«Вернуться къ оглавленiю Молитвы въ продолженіи дня»

Молитвенная помощь
      Просимъ молитвъ нашихъ читателей о здравіи и спасенiи души іеромонаха Митрофана, іеромонаха Варѳоломея, протоіерея Владиміра, іерея Бориса, iерея Алексiя, рабовъ Божiихъ Виктора, Максима, Сергiя, Галины, Елены, Татiаны и всѣхъ Православныхъ Христiанъ.

  Авторъ проекта Викторъ Богучаровъ .

  © 2008–2010, «Бесѣда въ храмѣ» .